Nganong langyaw man gyud ang pilion pagka-Mayor sa Lapulapu City?

Mao kini ang pangutana sa atong kahigalaan ug kaparyentihan sa Opon nga naglibog kun ngano nga lakip ang mga langyaw, buot mang mag-Mayor sa Lapulapu City! Usa ako sa mga gipangutana kaylagi, taga Opon man ta. De la Serna god. 

Kanang GY de la Serna St. ako nang uyoan, ang R de la Serna St., morag akong lolo, ug ang Pascual de la Serna St. (ambut hain na ni nila ibutang ron), lain nakong lolo. Mao nga mag-unsa sila diha sa Opon kay dia na man ko sa Guadalupe magpuyo, manginlabot gyud ta. Ug kun daghan pa ko'g kwarta, na-Mayor na sad tingali ko sa Opon.

Hinoon, maayo ra sad nga wa koy kwarta kay hasol kaayo ang pagka-public official dinhi sa Pilipinas. Mao bitaw nga mahibong ta ngano nga daghan ang mag-inilogay nga gamay ang sweldo ug dili makatumbas sa kahasol nga maangkon.

Anyway, at this stage, mora mag mahinayon gyud ang eleksyon (gawas og i-ignore lang gyud nila completely ang public clamor nga kinahanglan mag-eleksyon gyud), nagsugod nag bukal ang kaldero sa politika sa Lapulapu City, ug daghan na ang mi-signify nga molansar pagka-Mayor.

Of course, klaro na kaayo nga ang molansar puli ni Mayor Boy Radaza, mao ang iyang kapikas, si Paz nga dili bag-o sa pagpangatungdanang publiko. Di lang maghingalan sa posibli niyang mga kaatbang, apan mora'g upat ni sila, ang duha dili lumad nga Oponganon.

Hinoon, this is a free country, kun maka-establish lag pila ka tuig isip residence sa Lapulapu City, mo-qualify na sila paglansar. Walay balaud nga mopugong kanila. Apan, nganong sila man gyud? Kun sa atong pagtuo walay igong katakos si Paz pagdumala sa Lapulapu City, nganong taga-Cebu City o taga-Mandaue City man gyuy atong ipuli ni Mayor Boy?

Sa akong namatngonan og buot, gikan ni No Oping Dimataga (kapin sa 20 ka tuig nga Mayor), mibanos si Noy Max Patalingjug (dugay sad nga na-Mayor) dayon na-OIC is Beting Dignos, misunod si Mayor Weigel, ug dayon si Boy Radaza (ambut husto ba ko!). Silang tanan lumad nga Oponganon.

Apan karon, mora mag bakikaw kaayong paminawon nga kitang taga-Opon, mosalikway sa kaugalingon tang kapamilya ug ka-puso, ug maoy atong sagupon ang taga-Mandaue o taga-Cebu City? Mao kini ang ilang pangutana, Dro: Ngano man gyud?