EDITORYAL - Angay'ng ikalipay ug ikapasigarbo

Nakonpirmar na sa kadagkuan sa Guinness Book of World Records nga ang labing dako nga dance class nahimo dinhi sa dakbayan sa Sugbu.

Ang Sugbu mihulip sa maong kadungganan sa Budapest nga maoy mikupot sa maong titulo sud sa pipila ka tuig.

Mga 7,770 ka Sugbuanon ang misalmot sa maong dance class samtang ang Budapest nakatigom lamang og 2,289 ka partisipante.

Angay ikalipay ug ikapasigarbo dili lang sa mga Sugbuanon ang maong kalamposan kun dili usab sa tanang Pilipinhon.

Kanunay na lamang mangil-ad nga publisidad ang atong nadawat sa world press. Nakabawos na sad kita karon.

Salamat ug pahalipay sa Dance Sport Team Cebu International, Inc. nga maoy nipasiugda niining record-breaking nga dance class.