Health: Fundamental Human Rights

Gituman gayod sa mga drug manufacturers kaniadtong Sabado ang ilang saad sa pangulo nga isumitir niini ang lista sa baratong prisyo sa ilang mga tambal sa nag-unang sakit dinhi sa nasod aron dili kini mopagawas og kamandoan nga magbutang og limitasyon sa prisyo sa mga tambal. Ang departamento sa panglawas ug kongreso misugyot sa pagpabarato sa prisyo sa tambal sa 21 ka mga nag-unang sakit dinhi sa nasud human masuta nila nga wa tumana sa mga drug manufacturers ang Cheaper Medicines Law.

Hinoon human sa ilang pagpakigtagbo kang Pangulong Arroyo diin gisaad niini ang pagsumitir sa lista sa mga tambal nga barato na ang prisyo kaniadtong Sabado, sigon sa balita, gawas nga ila nang gituman ang ilang saad, gipasobra-an pa gayod sa mga drug manufacturers ang mga tambal nga ilang gipaubsan ang prisyo ina kay 21 lang ka mga essential medicines nga gisita. Maayo kining balitaa! Ang dili lang maayo, hangtod niining akong pagsuwat wala pa ipakita sa mga drug manufacturers ang listahan sa mga tambal nga ilang gipabarato ang prisyo.

Angay ug matarong lamang gayod nga paubsan ang prisyo sa tambal dinhi sa nasud tungod kay kun atong ikomparar ang prisyo sa atong tambal sa prisyo sa mao ra usab nga matang sa tambal sa atong mga silingang kanasuran, kita ang adunay pinakamahal nga prisyo sa tambal.

Dinhi sa Pilipinas mamatay ang tawo dili tungod sa iyang sakit kon dili tungod sa ka mahal sa prisyo sa iyang tambal. Ang tawo aduna pa untay kahigayonan nga mamaayo sa sakit nga iyang gipamati ug aduna pay kahigayonan nga mabuhi kun maabot pa lamang unta sa iyang bulsa ang prisyo sa tambal nga gikinahanglan.  

Hinungdan nga sa iyang pag-umol og mga patakaran sa panglawas, angayan untang ikonsiderar sa pangulo ang pagkamahinungdanon sa health services sa iyang katawhan ug dili lamang ang interest sa mga drug manufacturers dinhi sa nasud.

Katungod sa tawo ang mabuhi busa usa ka dakong kalapasan sa iyang tawhanong katungod ang paghikaw kaniya sa pagpakabuhi. Ang tawo gihikawan sa iyang katungod sa pagpakabuhi kun gihikaw kaniya ang maabot sa bulsa nga prisyo sa tambal nga makatabang sa pagpataas pa sa lugway sa iyang kinabuhi?

Ang health services usa ka batakang panginahanglanon sa katawhan busa usa ka kalapasan sa iyang tawhanong katungod ang paghikaw niini ngadto kaniya.