Ayaw idayon mayor

Husto si magpapatigayon Jonathan Guardo sa iyang pag-ingon nga angay’ng unahon ni Mayor Tomas Osmeña ang pag-atiman sa mga lumulopyo dinhi sa dakbayan, dili kay ang paghatag og incentives sa mga senior citizens sa Cordova.

Ang Cordova sakop na sa probinsya sa Sugbo ug klaro kaayo nga giplano kini ug buot buhaton ni Mayor Osmeña aron sa pagpakauwaw sa gobernador nga wala makahatag sa susamang incentive sa mga senior citizens.

Kun dili lainon ni Mayor Osmeña, motambag ko nga ang kantidad nga iyang ihatag sa mga senior citizens sa Cordova gamiton na lang niya pagpalit og dugang tambal diha sa Cebu City Medical Center.

Adto ra god sa CCMC mayor, malooy ka sa ubang mga taga dakbayan nga dili gani makapalit halos “pain reliever” sa ilang mga anak nga magkinahanglan aron pagwagtang sa sakit sa ilang samad.

Ihiklin usa ang pagpalagot ngadto sa gobernador. Dili maisip nga bayot ang usa ka lalaki nga dili mosukol og babaye. Ang maayo nimo nga buhaton mayor mao ang pagpakahilom na lang ug sa pagpalambo sa serbisyo sa katawhan.

Kun ihiklin lang nila ni Gwen ug Tommy ang panagbingkil, tingali molambo ang ilang serbisyo.

Dili bitaw ko makasabot usahay niining Mayor Tommy. Higala man g’yod mi, apan usahay mahiubos ka. Dihay mga higayon nga duna ko’y kuhaon nga inpormasyon kaniya, apan bugal-bugal ang tubag.

Ang ubang mga reporters nga mipadala kaniya og text message sa susamang pangutana, giingnan nga basahon ang iyang inpormasyon nga didto gihatag sa usa ka mantalaan.

* * *

Ang LTFRB regional office mipasalig nga Martes sa hapon ilang humanon ang resulta sa ilang imbistigasyon kabahin sa reklamo sa pipila ka bus operators batok sa Ceres Bus Liner.

Usa sa mga bus operators – si Roberto Librando – mireklamo g’yod kay ang Ceres Bus Liner kuno nangolekta og pletehan nga ubos kay sa gitugot sa LTFRB.

Giangkon ni Librando nga ang pagpangolekta og kubos nga pletehan, makaayo sa mga pasahero, apan makapatay kini sa negosyo sa ubang bus operators.

Nagtoo si Librando nga kun hingpit na nga “mangamatay” ang mga bus companies dinhi sa Sugbo ug ang Ceres na lang ang mahabilin, anha nang higayona nga sila mopamahal.

Ang gitugot god nga pletehan sa bus pagka karon tag P1.35 ang matag kilometro, apan giuyonan sa mga operators pinaagi sa pagtugot sa LTFRB nga ila kining pakubsan ngadto sa P1.20.

Apan matud ni Librando nga kining Ceres mangolekta lang og tag P.80 matag kilometro. Natural, ang mga pasahero adto mosakay sa ilang mga bus.

Alkanse tuod ang Librando ug ang ubang kompaniya kay mominus na man ang mosakay sa ilang bus. Dinhi nga si Librando mireklamo ug mihagit sa kadagkoan sa LTO ug LTFRB nga tan-awon kining kalapasan sa tagdumala sa Ceres.

Husto si Librando nga angay’ng tagdon sa kagamhanan kining ilang reklamo kay supak kini sa Memorandum Circular 031 nga giisyu sa LTFRB.

Basi sa maong lagda, ang masakpang makalapas niini multahan og P3,000 sa unang higayon, P4,000, P5,000, pagsuspenso ug pagkanselar sa ilang prangkisa sa ikaduha, ikatulo, ikaupat ug ikalima nga higayon nga sila masakpan nga milapas gihapon sa kamandoan.