Estrikto nga dakop

Midaghan karon ang mga abusadong drayber human nga gibawi sa kadagkoan sa Land Transportation Office (LTO) ang mga ID ug temporary operators permit nga giisyu ngadto sa iyang mga “organic personnel” ug mga deputized agents nga naglakip sa mga polis ug sibilyan.

Apan tambag nako sa mga drayber, ilabi na sa mga nagmaneho og PUJ, ayaw kaayo kamo pagpalabi og abuso kay maanad unya mo. Ang deputization ra ba sa LTO ngadto sa iyang mga sakop mobalik ra sa dili madugay nga pirmahan na g’yod ni LTO Chief Arturo Lomibao.

Akong klarohon nga ang pagbawi sa mga ID sa LTO ug TOP, dili ra dinhi sa Sugbo, kun dili sa tibuok g’yod nga nasud. Wala kini’y labot sa awhag sa mga drayber nga miawhag nga wad-on ang mga deputized agents.

Gawas sa pipila ka abusadong deputized agents, tan-aw nako mas daghan ang nakatampo og maayo pinaagi sa pagpatuman sa balaud ngadto sa mga abusadong drayber.

Sayop ang awhag sa Nagkahiusang mga Drayber sa Sugbo (Nadsu) nga abi kay daghan sa ilang mga sakop ang nadakpan sa mga deputized agents, buot nila nga wad-on na ang mga deputized.

Ang tukma ninyo nga buhaton mao nga magtinarong kamo sa pagmaneho aron dili madakpan.

Ang kauban nako nga mga maglilindog dinhi sa Banat News misaway pag-ayo sa giingon nilang abusado nga mga LTO agent. Tingali, nahitabo kini tungod sa dili maayong sestima.

Duna man go’y uban nga magpaila sa ilang pagkatawo kun madakpan. Mopaila sila nga polis, bombero, media, kawani sa kagamhanan, paryente ug mga dagkong opisyal ug higala sa mga LTO agents.

Kun ako ang makasugat niini, mopahiyom ra ko ug ang drayber nga akong gidakop ako rang ingnon nga mas labing maayo nga duna siya’y mga suod sa kagamhanan, ug nga maayo nga sila polis o kaha bombero.

Sa laktud ayaw g’yod pag-insultoha ang mga tawo nga magpaila sa ilang kaugalingon kay anha na diha mahitabo ang panaglalis. Pasabta ang imong gidakop nga wala kay mahimo gawas sa pagpatuman sa balaud.

Unya, kita usab nga mga drayber nga masita sa mga traffic enforcers kay nakahimo kita og salaud, mas labing maayo nga magpaubos ug dili masuko. Sa laktud dili nato ipakita ang atong kaisog.

Sabta ang mga deputized agents nga igo ra nga nagserbisyo sa pagpahapsay sa atong karsada pinaagi sa pagdakop sa mga wala motuman sa balaud.

Ang mga deputized agents wala’y sweldo nga gidawat gikan sa kagamhanan, apan kaming mga sakop sa LTO-Task Force Alpha dili gayod magbinuang pagdawat og suborno gikan sa mga madakpan.

Estrikto kaayo kami niana. Gawas pa, ang among mga sakop dunay mga maayong trabaho, dunay mga kaugalingong negosyo nga dili gayod matintal kun may drayber nga mosuway pagsuborno.

Bisan ako, makadaghan na ko nga gitanyagan og suborno aron kuno “sabot-saboton” ra nga dili siya dayonon og dakop, apan gipasabot ko siya nga kontra nako ang mga kurakut nga mga traffic enforcers.

Dili man g’yod kinahanglan nga ang tanang nakahimo og kalapasan sa balaud sa Transportation and Traffic Code imong dakpon.

Pananglit buntag pa nga sayo ug wala g’yoy sakyanan, unya may nakita ka nga drayber nga anaa miparking sa dapit nga “no parking,” ang maong drayber mahimong dakpon, apan kun wala g’yod siya makahasol sa dagan sa mga sakyanan, mahimo ra nga imo siyang sultihan. Kadaghan na nga duna ko’y gidakop nga mga higala sa mga opisyal sa LTO ug sa among grupo, apan ako silang giingnan nga wala ko’y mahimo kay nakahimo man sila og salaud.

Duna gani’y sakyanan sa CITOM nga ang drayber diriyot g’yod nako madakpi kay mipugos pag-overtake agi sa pikas agianan sa sakyanan nga ang karsada dunay “double solid yellow line.”

Mapanton unta kadtong maong drayber sa CITOM, sama niadtong drayber sa trak sa basura nga nakahimo og susama nga kasaypanan.