Imbistigara g'yod tawon

Daku g’yod ang akong pagtoo nga ang uban niining mga private water refilling stations wala makatuman sa tukmang lagda.

Tiaw mo, basi sa editorial sa The Freeman kagahapon, bisan ang mga magbabalaud didto sa Estados Unidos miawhag man gani sa tighimo og bottled water sa ilang nasud nga itataw kun giunsa nila pag-process ang ilang tubig.

Kay isip reporter suroyan man g’yod kaayo kami sa lainlaing dapit, ilabi na nga duna man ko’y sakyanan busa makabuot ko bisan asa moagi, pwerteng daghana na g’yod sa mga water refilling stations.

Kun moadto ka sa Natalio Bacalso extention duna, ari ka sa dapit sa V. Gullas luyo sa kanhi USP naa usab, sa Gorordo Avenue pwerteng daghana, diha sa barangay Apas duna usab.

Basta kay halos ang tanang lugar dunay mga water refilling station nga nagbaligya og kunohay tubig nga gipatoo g’yod nila nga limpyo ug mas luwas imnon kay sa tubig nga gikan sa gripo.

Apan ako lagi, nakapalit og tubig nga gisuplay gikan sa Century Spring diha sa Apas nga hugaw. Dunay duha ka guyo-guyo ug daghan pang hugaw dapit sa lubot sa water container.

Akong klarohon nga dili tingali ang tanang produkto sa Century Spring ang hugaw kay nagtoo ko nga dunay higayon nga nagtinapolan ang pipila sa mga trabahador sa maong kompaniya ug wala na lang hugasi ang ubang sudlanan sa tubig, ug usa niini akong napalit.

Alang sa tagdumala sa Century Spring, mas maayo tingali nga kun makahimo kamo og imbistigasyon, taktakon ninyo ang trabahante nga tigsulod sa tubig sa container.

Siya ang makadaut sa inyong negosyo. Sa akong pagtoo, kadtong water container nga nasudlan sa tubig nga akong napalit, naitlogan kadto og lamok sa wala pa sudli.

Kun gihugasan pa tingali, makuha g’yod ang itlog sa lamok. Apan kay posible man nga wala hugasi, aw mao nga pagbutang sa tubig didto ra ang itlog sa lamok ug napusa g’yod ni ug nahimong guyo-guyo.

Hangtud sa pagsuwat nako niining lindog kagahapon, buhi pa gani ang usa sa duha ka guyo-guyo, apan gawas niini makita pa ang hugaw sa tubig.

Ang ako lang mao nga dili na unta masubli kadtong hitaboa kay simbako og maapil og inom ang guyo-guyo ug ubang hugaw, ma-ospital ta ana. Maayo ra ba og ang tag-iya sa water refilling station ang mogasto.

Mao nga kitang mga pumapalit og tubig, angay gayod kita nga magmatngon. Apan ang nindot g’yod mao nga ang Department of Health motan-aw niining maong isyu.

* * *

Karong buntag diay – ug tingali molungtad hangtud sa hapon -- dunay kalihukan anha himoa sa usa sa mga kombento sa simbahan sa Mandaue nga maghisgot kini kabahin sa pagpangandam sa umaabot nga eleksyon.

Kun wala ko masayop, ang Dilaab Foundation maoy nagpasiugda niining maong kalihukan aron matudloan ang katawhan sa tukmang himuon aron mabantayan nga walay tikas nga mahitabo atol sa eleksyon.

Nasayran nako nga gihimo kining maong mga kalihukan sa lainlaing parokya. Usa ako sa giimbitar nga patambongon karong buntag.

* * *

Mora’g tan-aw nako, modayon na g’yod si kanhi Mayor Alvin Garcia sa paglansar sa umaabot nga eleksyon. Hinoon, tungason usa ang iyang kadaugan kun ang ikasangka niya mao si Vice Mayor Mike Rama, ilabi na kun mosalmot si Minnie Osmeña.