Ibalik ba nato ang death penalty?

CEBU, Philippines - Giwagtang sa atong gobiyerno ang death penalty kaniadtong 2001 kay bililhon ug sagrado kuno kaayo ang kinabuhi sa usa ka tawo makriminal man o inosente.

Nagsugod ang death penalty pinaagi sa 'garrote' dinhi sa atong nasud panahon pa sa mga Katsila diin sila si Gomburza kon Padre Gomez, Burgos ug Zamora nabiktima ug nangamatay niini kaniadtong 1872.

Ang 'garrote;' gisundan sa 'firing squad' diin si Dr. Jose Rizal namatay niini sa sayong kabuntagon kaniadtong Disyembre 30, 1896 didto sa Bagumbayan, Luneta.

Giilisan ang firing squad ngadto sa silya elektrika kon electric chair panahon sa mga Amerikano niadtong 1901.

Apan naguba kini sa kusog nga kilat nga miigo sa Muntinlupa kaniadtong 1977. Kay dako mag gasto ang atong gobiyerno kun ipa-repair kini, giilisan nalang ngadto sa 'lethal injection' diin si Leo Echegaray ang unang nahunosan sa iyang kinabuhi kaniadtong 1999.

Karon, reclusion perpetua na lang kon silot hangtod sa 30 ka tuig ang maximum penalty apan makagawas lang gihapon ang konbiktado inig-edad na niya og 70 anyos.

Mangutana kita: Ibalik ba nato ang death penalty? Ang tubag niini mao nga ibalik gyod kay wala nay gikalisangan ang mga kriminal ug mga hold-uppers kay mopatay na gyud sila sama sa nahitabo kang Reverend Father Jovencio Rabusa ug sa usa ka empleyado sa LBC Air Cargo didto sa Mandaue ug ni Ruby Jade Ruba nga usa ka graduating nursing student sa Cebu Doctor's University.

Mao kini angay'ng hinuktokan sa atong mga magbabalaod karong panahona.

Di ba?