Tinuod nga resulta sa piniliay - hagit sa Comelec

Salamat kay mahinayon na gayod ang Poll Automation. Hinaut, wa nay motumaw nga suliran sa umaabot nga mga adlaw mahitungod sa paghimong moderno sa atong piniliay dinhi sa nasud. Apan tubag na gayod kaha ang Poll automation sa kanunay’ng gidudahang resulta sa miaging mga piniliay?

Bisan tuod aduna koy mga reserbasyon sa Poll automation, ako naglaum nga madawat ug katoohan na unta ang resulta ning umaabot nga bugnong lugaynon. Mawagtang na unta ang reklamo sa mga politiko ug mga kandidato nga gitikasan hinungdan nga naparot sa piniliay.

Ang tinuod nga resulta ning umaabot nga piniliay mao ang dakong hagit sa Commission on Election nga gipangulohan karon sa retiradong mahistrado sa korte suprema nga si Jose Melo.

Sigon sa akong obserbasyon makamao ug nakat-on na ang mga botante sa pagpili og kandidato. Salamat sa kahugpongan nga naglihok aron ang mga botante makasabot na sa pagka mahinungdanon sa ilang boto. Apan ang pagkamao ug pagka maayo nang mopili sa mga botante og kandidato masayang lamang kun tikason ra gihapon ang ilang boto. Masayang ra gihapon ang paningkamot sa kahugpongan nga naglihok alang sa pag-edukar sa mga botante kun dili unya motakdo sa ilang gipili ang mogawas nga resulta sa piniliay kay gitikas sa mga tikasan. Ang tinuod nga resulta sa piniliay mao ang dakong hagit sa Commission on Election, hagit nga kun matubag, makapahibalik na unya sa pagsalig sa katawhan sa piniliay ug sa Commission.

Lain usab nga makapahibalik sa pagsalig sa katawhan sa Commission on Election mao ang pagpuo sa mga kaliwat ni Bidol Quirol ug Virgilio Garciliano sa nahisgutang buhatan kay ang poll automation wa gihapoy silbi kun sa pipila ka dapit sa Mindanao humana ang piniliay bisan wala pa ang adlaw niini kay naa pa ang mga kaliwat ni Bedol.

Ang hagit sa tinuod nga resulta sa piniliay matubag unya kini sa Commission on Election pagkahuman sa 2010 nga bugnong lugaynon. Mawagtang usab unya ang atong mga pagduda sa pagka epektibo sa Poll automation kun wa na unya’y reklamo sa dagdag bawas pagka human sa iniphanay.