EDITORYAL - Pangaliya alang ni Cory

Anaa karon sa “seryoso” nga kahimtang si Kanhi Presidente Corazon “Cory” Aquino kinsa nakig-away sa kanser nga mitakboy kaniya.

Sumala sa balita, si Cory dili na mokaon ug anaa kini karon sa Intensive Care Unit sa usa ka ospital didto sa kaulohan.

Mihangyo ang pamilya ug ang tigpamaba sa kanhi Presidente nga dili lang panumbalingon ang kondisyon ni Cory kun dili i-ampo lamang kini ngadto sa Kahitas-an.

Adto pang miaging tuig nga nakonpirmar ang kanser sa colon ni Cory. Bisan pa sa iyang delikadong kondisyon nagpadayon gihapon siya sa pagsalmot sa mga kalihokan diin nalambigit ang kaayohan sa nasud nga Pilipinhon.

Miduyog kami sa pag-ampo alang sa kanhi Presidente nga unta magpadayon ang iyang kusog ug kaisog sa pag-atubang sa iyang balatian.