Ngitngit pa gyud ang poll automation

Kalit lang mituwad ang Total Information Management System sa ilang pagpakig-uban sa Smartmatic Corporation alang sa 2010 nga bugnong lugaynon tungod sa giingong dili na mahilot nga kasungian. Apan gibulgar ni kongresista Teddy Boy Locsin nga kuwarta ang hinungdan sa kasungian. Matud pa gipangayoan sa Total Information Management ang Smartmatic og tunga sa bilyon nga kantidad sa salapi apan gibalibaran kini. Gilalisan usab sa duha ka kompanya kun si kinsa ang mohupot sa kuwarta.

Mao gyud kaha kini ang hinungdan sa ilang kasungian? Di lang kaha ni plantada sa tinooray gayod nga hinungdan?

Samtang giingong kuwarta ang hinungdan sa kasungian, dili usab ikalimod nga aduna seguroy laing hinungdan sa ilang kasungian. Pero sa di pa ta moadto sa uban nga gituhoan natong hinungdan unahon sa nato ang hinungdan nga kuwarta. May kuwarta kaha ang Total Information Management System sa ilang pagpakig-uban sa Smartmatic alang sa Poll Automation? Di kaha laway lang ang ilang puhonan sa ilang pagpakigminyo ngadto sa Smartmatic. Di kaha maoy plano sa TIM System nga ang Smartmatic maoy pagastohon tanan sa Poll Automation kay wa sila’y kuwarta hinungdan nga ila kining gipangayoan og tunga sa bilyon sa dihang napiit na?

Ang laing posibilidad nga di nato masalikway mao ang mga tawong dili gustong adunay piniliay. Kay dili gusto nga mahinayon ang piniliay gibulabog ang pagpangandam sa Commission on Election.

Kun nagduda ka sa mga tawong dili gusto nga adunay piniliay di upod nato mapadaplin ang mga tawong dili gusto nga mahi-tek ang piniliay tungod kay maglisod na sila sa ilang naandan nga gimbuhaton - ang pagpanikas sa mano-mano nga piniliay.

Ang gibuhat sa Total Information Management System nagbutang sa Commission on Election sa alanganin. Ning maong kahimtang tabla pay gioto-otohan lang ang Comelec. Gikingkoy lang tawon sila sa midaug nga bidder sa gitingohang Poll Automation.

Kun gusto man sa Comelec ang Poll Automation sa umaabot nga mga piniliay sa nasud kinahanglan nga disiplinahon ang kompanyang mikingkoy nila. Kun palabyon lang sa Comelec ang gihimo sa TIM System karon, mao gihapon kini ang mahitabo sa planong Poll Automation sa mga umaabot nga piniliay.