Ang politiko ug ang lider

Mikulo-kulo na ang kawa sa politika dinhi sa nasud bisan 11 pa ka buwan ang atong paaboton sa dili pa ipahigayon ang nasudnong bugnong lugaynon. Ang mga magpapili sa nasudnon ug lokal nga position dagko na og gasto alang sa pag paila-ila sa ilang kandidatura bisan wala pa magsugod ang opisyal nga kampanya. Tungod kay ang pagpaila-ila dala nang pangampanya, mibobo na sila og dagkong kantidad sa salapi.

Si Senador Mar Roxas migasto na og 140 milyones ka pesos sa iyang padyakpadyak samtang si Senador Manny Villar migasto na usab og 80 milyones ka pesos sa iyang ofw nga advocacy ad. Si Senador Loren Legarda wa pud magpalupig nakagasto na usab siya og 10 milyones ka pesos.

Gawas sa mga advocacy ad mikusog na usab ang nilabayay og mga pagsaway. Kutob sa makita nga hulga sa ilang kandidatura sawayon aron mahimo kining dautan sa mga mata sa katawhang ilang gipangulitawhan.

Kay naghuna-huna nga magpapili, ang mga tawong di nimo makit-an nga mosuroy sa mga dapit nga gitapukan ug gipuy-an sa mga kabus imo nang makit-an nga nakighalobilo kanila ug gani tam-is nang tan-awon ang ilang pahiyom sama ni Mayor Tomas Osmeña. Sa iyang pagsuroy didto sa Duljo tam-is kaayo ang iyang pahiyom, pahiyom nga di gyod nimo makit-an nga manghingilin diay ni siya og kapitan nga moabot sa iyang opisina, manghingilin og bisita sa iyang birthday kay wa imbitaha ug uban pa.

Ang mga gihimo karong kalihokan niadtong mga gustong magpapili sa umaabot nga bugnong lugaynon gipunting sa pagdani sa mga botante aron sila botaran. Busa pagbantay kamo niadtong mga tawong tigpakaaron-ingnon, mga tawong maayo lang kun adunay piniliay pero salbahis kun mapili na.

Mintras tantong layo pa kilatisa ninyo pagmaayo kadtong mga nagpaila nga magpapila. Ang sugyot ko kaninyo, sa inyo unyang pagpili, pilia kadtong mga lider, ayaw ninyo pilia ang mga kandidatong politiko kay ang mga politiko dautan samtang ang mga lider maayo. Hinumdomi ninyo nga wa ta manginahanglan og politiko, ang atong gikinahanglan karon mao mga lider nga maoy manguna kanato sa pagkab-ot sa unsay gusto natong kab-oton.