Habog nga paril

Angkonon ko nga usa ako ka hambugero. Apan, kinsa man kaha ang dili magpasiatab kun kamo pa ang nahimutang sa akong nahimutangan karon. Guwapo ako, milyonaryo, edukado, aktor ug sikat nga mag-aawit.

Tungod niini, gitahod ako ug giyukbuan bisan pa sa mga kadagkuan sa among lalawigan. Apan, wala ako magdahom nga ang akong dako nga bentaha batok sa ubang linalang mao ra usab diay ang makapukan kanako.

Gumikan sa akong naghitak nga bahandi sayon ra kaayo alang kanako ang pagsingka, pagkasaba, pag-insulto ug pagbakyaw sa akong mga kamot aron sa pagtamparos sa pagkulata sa mga tawo nga masinupakon sa akong gusto.

Gumikan sa akong dako nga bentaha ako na nga nakalimtan nga ang tawo aduna diay balatian. Nga makamao usab nga mohilak ug mubakho kun imong samaran.

Gumikan sa akong ngil-ad nga batasan ang ako nga mga katabang ug mga drayber galumba og pamahawa. Bisan gani ang suod ko nga mga higala milikay na kanako.

Ako na karon nga napamalandong nga ang ato diay nga dako nga bentaha mao ra usab ang makapusgay sa atong pagkatawo kun wala kitay igong kaalam nga mopugong sa atong tawhanon nga pagbati. Nga inay magbuhat ako og taytayan pinaagi sa pagpaubos aron sa pagkabig sa katawhan ngari kanako. Nagtukod na hinoon ako og usa ka mahabog nga paril aron walay makaduol kanako.

Si Jean Baptiste Masillon mipahinumdom kanato. "To be proud and inaccessible is to be timid and weak."