Desperado tungod sa SRP

Misaka na usab og 50 sentimos ang matag litro sa gasolina ug krudo kagahapon sa tungang gabii. Rason sa mga player mao ang pagsaka kuno sa dolyar batok sa peso.

Kapait na ba! Ang unleaded nga maoy itubil sa akong sakyanan ug motorsiklo mipatong na sa P44.94. Sa ato pa, 06 sentimos na lang mo-P45 na. Sunod semana o sunod duha ka semana, makigpustaanay ko, mosaka na usab og 50 sentimos ngadto sa piso matag litro ang presyo sa mga produktong petrolyo.

Walay nakabantay? Tingale, walay nagtagad niini karon nga bisi kaayo ang mga tawo pagpaminaw sa mga isyu sa politika tungod sa kadaghan sa gustong managan pagka-presidente ug isyu sa Constituent Assembly.

Makaduda kaayo ang sigeng pagpataas sa presyo sa petrolyo karon nga hapit na ang eleksiyon. Ang ubang mga tigpaniid sa politika nagkanayon nga ang pagsige og pamahal sa presyo sa gasoline, krudo ug LPG gituyo aron makatigum ang mga kompaniya sa lana alang sa campaign contribution kay lagi sunod tuig na ang eleksiyon.

Lisud tuohan, apan dili kita makalikay sa pagduda niini tungod sa ka-imposible sa mga rason. Samotan pa nga klaro kaayo ang atong Department of Energy tua makapusta sa mga kompaniya sa lana.

* * *

Kinahanglang dublehon ni Jonathan “Atan” Guardo ang paninguha aron matuman na ang iyang politikanhong pangandoy nga mahimong kongresista sa south district sa dakbayan sa Sugbo karon nga ang klarong kontra niya may apelyidong Osmeña.

Kun dili si Tomas o si Minnie, si Margot ang ikaparang ni Atan.

Ang plano sa Bando Osmeña Pundok Kauswagan (BOPK) nga usa ka Osmeña ang ilang padaganon pagka-kongresista, ilabi na nga si Tomas ang usa sa nagplano, usa ka dakong timailhan nga nahadlok sila kang Atan.

Sa pagdagan pa lang ni Atan niadtong miaging eleksiyon misabod na kini og binhi ngadto sa mga residente sa south district ug bisan napilde kini, wala kini puas sa pagtuyok sa mga barangay sa south district ug pag-establisar og “good will” pinaagi sa mga serbisyo publiko sama sa pagpahulam og tent sa mga namatyan ug espesyal nga okasyon, bus alang sa tour ug picnic ug hinabang sa mga nanginahanglan.

Mao tingale kining mga butanga ang nakapahadlok ni Tomas nga basin og mailog ni Atan ang bandira sa south district gikan sa BOPK, karon nga anaa na sa ikatulo ug katapusang termino si Kongresista Antonio Cuenco.

Wala nako makonpirmar, apan adunay impormasyon nga si Sir Tony ug si Atan nagkabalikay na sa maayong kabubut-on. Maayo lamang usab kay si Sir Tony nabiktima usab sa birada ni Tomas sa dihang giintriga sa mga hinguwartang mga kapitan nga misulsol ngadto sa mayor og mga impormasyon nga makadaot sa kongresista.

Tataw nga gikuyawan si Tomas kang Atan ilabi na nga ang South Road Properties (SRP) anaa mahimutang sa south district.

Simbako og si Atan ang modaog sa south district, dili makaako si Tomas nga madaot iyang mga diskarte pagbaligya nianang multi-million peso nga proyekto. Kini, ilabi na nga aduna nay deal ang kagamhanan sa dakbayan sa Sugbo ug ang Filinvest.

Kun modayon gyud hinuon si Tomas pagdagan sa south district, usa gyud ka sakaon nga kampanya ang masinati ni Atan.

Kaniadtong gipaningot siya pag-ayo sa ilang bugno tali ni Sir Tony, dili lang tingale singot ug bungag singot ang iyang mahiagoman kun dili bun-og sa bulsa.

Sa text message ni Atan kagahapon, kini nagkanayon nga gihimo na nga “family enterprise” ang SRP. Gani gihinganlan niya kini og “Osmeña Incorporated” ug managan silang Tomas, Minnie ug Margot aron lang mogamot sa gahum.

* * *

Daghang mga tunghaan kagahapon ang naglibog kun buhian ba nila og sayo ang mga pupil ug suspensohon ang klase sa dihang gipahibalo sa Pagasa nga miigo sa atong hurisdiksiyon ang bagyong Feria.

Sa Minglanilla, nakakatawa ko sa estorya nga adunay tunghaan sa barangay Vito nga ang mga ginikanan lang pabut-on kun patunghaon ba nila o dili ang ilang mga anak taliwala sa pag-ulan-ulan.

Misamot ko og katawa sa dihang adunay ginikanan nga miingon nga gisuspenso ang klase niadtong mga bata nga kinahanglan pa og molabang og sapa paingon sa tunghaan gikan sa ilang panimalay ug sa ato pa kadtong dili molabang og sapa, kinahanglang motungha.

Pero dunay bata nga guwatsinaggo, gipangutana sa iyang amahan nganong mipauli. Gitubag ang amahan: “ako giingnan si Mam nga adto ko moagi sa sapa Mam.” Gipapauli na lang sa maestra ang bata sa kahadlok nga maanod sa sapa nga dili niya agianan paingon sa ila.

Kataw-anan!

Pero ang akong punto mao nga ang Department of Education pakyas diay gihapon pag-edukar sa mga principal ug administrador sa mga tunghaan sa Cebu sa tukmang lakang nga pagahimuon sa higayon nga adunay bagyo o katalagman nga manghitabo.

Dili lalim alang sa mga ginikanan nga mogasto pa og plete sa ilang mga anak nga patunghaon unya balibaran lang ug papaulion kay lagi dunay bagyo.

Ang maayo unta niini adunay sistema nga sagopon ang DepEd aron masayran sa mga ginikanan kun angay ba patunghaon ang bata o dili ba taliwala sa makusog nga bunok sa ulan. Nakapanghinuklog ko kagahapon nga hasta ang polisiya sa DepEd nagbagyo!