Tinuod bang huyang ang ebidensiya?
Human makagawas sa prisohan niadtong miaging semana, ang sinagop ni Mayor Socrates Fernandez sa dakbayan sa Talisay gikatahong misaad nga magbag-o.
Si Joavan Fernandez nga kaniadto kanunay nga malambigit sa kagubot diha sa Talisay gawasnon na sab pagbalik human tugoti ni Judge Manuel Patalinghug sa Regional Trial Court nga makabutang og P200 mil nga piyansa sa duha ka kasong serious illegal detention with physical injuries.
Ang maong mga kaso dili unta angayang tugotan ang akusado nga makapiyansa. Apan tungod kay matud sa huwis huyang kuno ang ebidensiya sa prosecution iyang gitugot ang petition for bail ni Joavan.
Ang maong mga kaso naggumikan sa reklamo sa manag-agaw nga si Osbert ug Winston Abellana nga namasangil nga gidagit ug gibun-og ni Joavan ug sa iyang mga higala niadtong miaging tuig tungod sa pagkahanaw sa reserba nga ligid sa iyang amahan samtang gibilin sa vulcanizing shop nga ilang gialagaran aron tapakan.
Sila si Osbert ug Winston gidala didto sa panimalay ni Joavan diin didto sila maluwas sa kapolisan. Bun-og ug ginapos ang duha dihang naabtan sa kapolisan didto sa gawas sa panimalay ni Joavan. Karon, huyang ba tinuod ang ebidensiya?
Si Winston misibog hinuon sa kaso, apan misibaw sab ang taho nga nabayran siya ug ang iyang iyaan nga si Merceditha hinungdan sa pag-atras. Si Osbert ug ang iyang amahan nga si Oscar maoy milahutay ug gipadayon ang kaso bisan sa mga hulga nga ilang nadawat.
Karon ubos na sa witness protection program sa Department of Justice ang duha.
Dili ni maoy unang higayon nga nakalusot si Joavan sa prisohan, pipila ka tuig na ang nakalabay gilambigit sab siya sa pagpamusil sa usa ka drayber ug konduktor nga sila si Panfilo Barinque ug Timoteo Aleo.
Patay si Barinque ug nasamdan si Aleo, apan ang pamilyang Barinque misibog sab sa kaso samtang si Aleo wa na igkita. Ang pamilya ni Barinque gihatagan og trabaho sa City Hall sa Talisay ug diha pay report nga gihatagan og balay aron lang isibog ang kaso.
Wa hinuon makumpirmar ang report maylabot sa paghatag og balay apan kumpirmado nga ang anak ni Barinque anaa na magtrabaho sa City Hall.
Pero taliwala niining tanan, si Joavan, miingon nga inosente siya sa tanang mga pasangil batok niya mao man gani nga kanunay siyang makalusot. Pero kun tinuod siya nga inosente sa mga pasangil, unsa may iyang bag-ohon sa iyang kaugalingon?
Nganong human siya makagawas sa miaging semana gikan sa prisohan nipasalig man siya nga magbag-o na? Kun inosente ang usa ka tawo sa tanang mga pasangil batok niya dili siya angayang magbag-o. Gawas lang og iyang angkunon ang tanang mga pasangil ug mangayo og pasaylo sa tanang iyang nasaypan ug mo-plead guilty sa mga kaso nga pending pa karon batok niya.
* * *
- Latest
- Trending
