Angay ba nga kaloy-on?

Tan-awa ra god kining ubang mga tawo nga ambot, gahi ba g’yod kaha og ulo o kaha gusto lang g’yod nga magpabadlong.

Usa ka tawo nga nagpaila nga barangay konsehal sa usa ka bukirang barangay sa dakbayan sa Sugbo, nadakpan sa usa ka LTO agent nga nagmaneho og motorsiklo nga wala magsul-ob og crash helmet diha sa D. Jakosalem kaniadtong Biyernes sa hapon.

Pwerte g’yod niya nga nakahangyo nga dili na lang siya dakpon, apan wala kini mosalir kay ang nagdakop kaniya gusto g’yod og patas nga pagpatuman sa balaud.

Luoy g’yod unta kay tiaw mo’y P1,776 ang multa kun masakpan ka nga dili magsul-ob og crash helmet, apan gipakapinan pa man g’yod niya pag-ingon nga may kumpare siya nga anaa magtrabaho sa LTO.

Apan dihang giisyuhan na siya sa TOP, pwerte na kini nga nakahangyo nga dili lang dayonon pag-imbargo ang iyang lisensya. Dihang giingnan sa LTO agent nga ipakuha lang ang iyang lisensya sa iyang kumpare nga anaa sa LTO, milubad ang iyang pamahayag.

Dihang mipauli na ko pagka gabii, nasundan pa nako ang maong drayber didto sa Lahug kay mipasilong tingali atul sa pagbunok sa uwan apan wala gihapon mag-helmet. Ang nindot kaayo niya nga crash helmet diha ra gihapon sa siko gikaw-it.

Angay ba god nga kaloy-on ang maong drayber? Diha sa’y usa ka tawo nga nagpaila nga “police confidential agent” ug dili g’yod gusto nga magpadakop bisan og wala mag-helmet ug ang iyang motor wala pa’y headlight.

Ako lang kamo nga pahinumdoman nga isip mga opisyal sa barangay giisip kamo nga “persons in authority” ug ang pagka police o “asset” agents to persons in authority. Kamo unta ang mopasunod sa mga ordinaryong sibilyan nga dili mohimo og kalapasan sa balaud.

Ayaw ninyo himoa nga rason nga abi kamo kay polis, o kaha ang sakyanan gipanag-iya sa polis, mohimo na kamo og kalapasan. Awhagon nako si higalang Police Regional Director Lani-O Nerez nga mohimo siya og kamandoan niini sa iyang mga sakop.

Ang tinuod, isip pag-ila nga ang mga polis kauban ra nga mga “enforcers,” ang mga traffic authorities dili gayod buot modakop kanila, apan law-ay kaayo tan-awon nga dakpon ang mga ordinaryong sibilyan unya pasagdan lang ang uban. Sabtan ba ko ninyo?

Isip mga polis o kaha mga agents wala kini magpasabot nga lisensya na kini nga kamo mohimo og salaud. Didto sa Natalio Bacalso Avenue niadtong miaging semana, laing police agent ang miingon nga usahay dili siya mag-helmet nga mogukod kuno sa snatcher.

Porbida! Nahimo ko nga police reporter mga 10 ka tuig nga tingali ang maong tawo wala pa mahimong “asset.” Dili na ko madala sa bolada sa maong tawo kay sa kadugay na nako sa akong katungdanan, mora na usab gani ko’g polis.

Ang akong ikasulti no, kamong mga “confidential agents” ayaw ninyo ipanghambog ang inyong pagka asset sa polis. Gamita kini sa pagtuman sa gitahas kaninyo nga maniid sa mga binuang og ireport sa inyong mga handler.

Ang maayo ninyo mao nga maniid kamo kinsa ang mga traffic enforcer nga kurakut, nga dali kaayo mahaylo sa suborno sa mga drayber. Kining maong matang sa mga traffic enforcer maoy gusto nako nga mawagtang sa trabaho kay nagduhig ra sila og kauwawan sa ubang mga tarung nga enforcers.