30. Vitamin B6 ug uban pa

Ang Vitamin B6 o pyridoxine usa sa siyam ka bitamina nga matunaw sa tubig. Makuha kini gikan sa karne, isda, manok, mga liso, cereals, tam-is ug puting patatas, spinach, mani, saging, pakwan, walnuts ug prunes.

Kining maong bitamina makatabang aron ang lawas makapahimulos sa protina ug carbohydrates. Makatabang usab kini pag-umol sa pulang selula sa dugo ug sa regulasyon sa mga ugat.

Gikinahanglan ang Vitamin B6 sa mga tigulang kay kini makatabang aron dili sila daling takboyan og balatian.

Laing bitamina nga matunaw sa tubig mao ang Vitamin B12. Makuha kini gikan sa karne (baboy ug baka), manok, itlog, gatas, mga produktong gikan sa gatas, prutas ug mga utanon. Makatabang kini pagpahimsog sa nervous system ug sa paggamit sa DNA.

Ang Biotin makuha gikan sa karne, atay, manok, isda, itlog, nuts, bukog, cereals, prutas, yeast, utanon. Isip bitaminang matunaw sa tubig, makatabang kini pagtibuok sa glucose ug fatty acid.

Ang folic acid makuha gikan sa dahonan nga mga utanon, manok, atay, legumbre, enriched cereal, pan, duga sa dalandan ug grapefruit. Isip bitaminang matunaw sa tubig, makatabang kini pagtibuok sa pulang selula sa dugo ug sa paggamit sa DNA.

Ang Vitamin C matunaw sab sa tubig. Kini makuha gikan sa prutas, duga sa sitrus, strawberries, melon, dahonan nga mga utanon, repolyo, patatas, sili ug cauliflower. Makapalig-on kini sa bukog, ngipon ug lagos. Makatabang aron daling maalim ang samad, mopalig-on sa resistensiya batok sa impeksiyon ug mohatag og relief sa sip-on. Ang Vitamin C usa ka antioxidant. (Sunod: Bottled Water Sa India)