Abang og imong opisina

Pila ka semana na ang milabay si Regional Trial Court executive judge Mienrado Paredes miluwat og memorandum nga nagdili sa tigpa-lending nga si Victor Yu paggamit sa opisina sa maintenance sa Palace of Justice sa iyang negosyo.

Nakadawat man gud og daghang reklamo si Paredes nga si Yu mihimo sa maintenance office sa Palace of Justice nga daw iyang opisina. Nunot niini gimanduan ni Paredes ang building administrator nga si Engineer Isagani Saranillo nga dili na tugotan nga gamiton ni Yu ang iyang buhatan.

Sulod sa pipila ka adlaw sukad miluwat si Paredes sa maong memorandum wa ko na sab igkita si Yu nga misulod sa maintenance office. Sa akong nasayran wa pa libkasa ni Paredes ang iyang memorandum, apan nganong sa miaging semana nakit-an na sa media si Yu nga mibalik og sulod sa maintenance office aron pagpahigayon sa iyang negosyo.

Nagdahom si Yu nga way mga sakop sa media nga nagkabantay sa iyang pagsulod sa maintenance office. Akong namatikdan nga mas nalisang si Yu sa mga sakop sa media kay sa huwis nga nagdili niya paggamit sa opisina sa gobyerno sa iyang pribado nga negosyo.

Kini tungod kay daghan nga nisumbong nako nga media lang ang iyang bantayan aron mohilom pagsulod sa maintenance office. Gani ako mismo personal nga nakadungog niya samtang diha ko sulod sa usa sa mga pansayan duol sa maintenance office nga miingon “ ayaw diha kay naay media.”

Sa akong pagsusi akong nasuta nga si Yu mibalhin diay og pahimutang didto sa Parole and Probation sa ika-upat nga andana sa Palace of Justice, lain ning buhatan sa gobyerno.

Kun gusto si Mr. Yu nga way manghilabot sa iyang negosyo nganong di man siya magtukod og iyang kaugalingon nga opisina? Sa ka dako sa iyang ginansiya gikan sa mga gipautang nga kwarta ngadto sa mga nagkinahanglan nga mga kawani sa korte sigurado ko nga makabayad siya og abang sa bisan gamay nga opisina duol sa Palace of Justice.

Dili makiangayon nga iyang pahimuslan ang opisina sa gobyerno nga libre samtang siya labihan ka siko sa mga kawani sa gobyerno nga mangutang kaniya. Sumala pa sa mga kaila nako nga nakautang kaniya nga di gyud pautang si Yu kun way garantiya nga ATM.

Buot ipasabot nga si Yu maoy mokubra sa sweldo sa mga utangan kaniya og sukli nalay ihatag sa mga utangan. Kaluoy sa mga empleyado di gyud intawon ka eskapo.

Busa kun dunay bisan dyutay nalang konsensiya si Mr. Yu, abang og imong kaugalingong opisina ayaw panggamit sa opisina sa gobyerno. Wa gani ta masayod og nibayad ba sab si Mr. Yu og buhis didto sa Bureau of Internal revenue nga sa akong tan-aw mura man og kolurom ang iyang negosyo kay di man gusto nga magbaton og klarong opisina.

Maayo sab tingali nga susihon ni Judge Paredes nganong wa hingpit nga ipatuman ang iyang memorandum nga nagdili ni Yu paggamit sa opisina sa gobyerno diha sulod sa Palace of Justice sa pribado nga negosyo sa tigpa-utang nga si Yu.

* * *

[email protected]