Gisugat ko og dili maayong balita kagahapon sa buntag da. Kini mao ang pagsaka na usab sa kantidad sa fuel products.
Ang diesel nga maoy fuel sa akong sakyanan gipausbawan na usab og 75 sentimos ug 50 sentimos sa gasolina. Ang nakapait pa g’yod kay tag P1.50 ang usbaw sa matag kilo sa LPG products.Gikuyawan ko da nga basin og mobalik na usab ang presyo kaniadto nga tag P61 ang litro sa diesel.
* * *
Diay nindot nga balita nga angay’ng hinumdoman kanunay sa mga ginikanan nga dunay mga bata nga gipatungha diha sa mga public schools.
Gimando ni DepEd Secretary Jesli Lapus nga dili pakolektahon og bayad sa school ID ang mga nagdumala sa mga tunghaan ngadto sa mga ginikanan.
Kamong mga nagdumala sa mga public schools, kun wala pa kamo makadawat sa memorandum gikan ni Secretary Lapus, tan-awa ninyo sa official website sa DepEd.
Gimandoan kamo nga ang bayad sa pagpahimo og school ID’s anha kuhaon sa inyong Monthly Operating and Other Expenses (MOOE).
Gituyo kini ni Lapus kay duna man g’yoy mga ginikanan nga naglisud gani sa pagpatungha sa ilang mga anak.
* * *
Lisud kaayo karon ang pagpatungha sa atong kabataan. Mahal kaayo ang bayranan diha sa mga private schools.
Medyo bobarato man g’yod unta diha sa mga public schools, apan risgo kaayo kay pwerteng daghana nga mga fraternity ug posible nga masakop na hinoon ang imong anak sa maong grupo.
Sa akong pakisusi, daghan ang dili g’yod unta gusto nga mopasakop sa mga fraternity sa sinugdanan apan unsaon nga hulgaon man sila mao nga mapugos na lang.
Sa laktud, mihukom na lang tawon ko nga ang akong first year high school naa na lang nako gipatungha sa private school aron malikay sa mga fraternity.
Ang mga binuang naa usab sa mga night high schools mao nga kamong mga ginikanan, superbisahe pag-ayo ang inyong kabataan.
* * *
Duna g’yod diay daghang mga drayber sa taxi nga mamili og pasahero nga ilang pasakyon. Dili kini maayo.
Naguba man god ang battery sa akong sakyanan mao nga napugos ko pagsakay og taxi dihang nagkuha ko og service battery sa usa ka battery shop sa Natalio Bacalso Avenue.
Gipangutana ko sa drayber kun asa ko. Dihang akong giingnan nga sa Busay duol sa Marco Polo Hotel, kabalibaron, apan wala na lang kay nakakita sa akong ID diha sa akong bag.
Dili lang nako isulti kun unsa ang maong ID, gawas sa akong Press ID. Ayaw tawon mo pamili og pasahero uy mga drayber.
Kalapasan baya na sa lagda sa maayong pagmaneho og mahimo kamo nga madakop “for refusal to convey.” Bitaw kun ako ang himoan sa drayber, sigurado nga makabayad og dakung multa.
* * *
Uy, kamong mga drayber og motorsiklo diha sa Talisay ug silingang mga dapit, lukat mo’g lisensya ha, unya ang inyong motor butangi g’yod og side mirrors ug pagsul-ob usab og helmet aron dili kamo madakpan.
May plano ang mga LTO agents nga molusad og operation sa inyong mga lugar. Tabang lang ning ako aron dili kamo makamulta.
Kamo usab diha sa Consolacion, Liloan ug Compostela tumana ninyo ang balaud sa transportasyon aron dili madakpan ug makabayad og dagkong multa.