Samtang may gininhawa pa

“Samtang may gininhawa pa” mao kini ang kasagarang madungog nako sa mga tawong malaumon nga dunay kasulbaran ang mga problema samtang buhi pa. Mao nga kun maghisgot kita og suliran, masulbad gihapon sila samtang buhi pa ang tawo. Karong Domingoha gisaulog nato ang usa ka mahinungdanong panghitabo. Gisaulog nato karon ang “Pentekostes” nga mao usab ang higayon diin ang mga sumosunod sa Ginoo nakadawat sa gasa sa Espiritu Santo diha sa dagway sa dila nga kalayo. Kini ang mahinungdanong panahon sa pagkahimugso sa simbahan.

Walay kinabuhi ang simbahan kun wala ang Espiritu Santo. Ang Espiritu Santo kinabuhi ug nagdala og kinabuhi sa simbahan diha sa iyang makanunayong panaw padulong sa kahingpitan. Siya ang gininhawa nga naghatag og giya sa mga magpapanaw. Siya ang tinubdan sa mga nagkadaiyang gasa nga maoy nakapahimo sa usa ka simbahan nga mabulokon. Siya ang naglamdag sa hunahuna natong mga tawo diha sa atong paghimo og mga mahinungdanong hukom sa kinabuhi. Samtang anaa pa siya kanato padayon kitang makakaplag sa atong tagsa-tagsa ka mga karisma. Mao nga ning solemning pagsaulog sa Pentekostes, gidapit kita sa pagtugyan sa atong kaugalingon ngadto sa lamdag sa mao rang Espiritu Santo.