EDITORYAL - Importanteng isyu nalubong

Adunay usa ka isyu nga naay dakong importansiya sa atong nasud ug kanatong mga lungsoranon apan daghan ang wala masayod tungod kay nasentro man ang atensiyon sa publiko ngadto sa mga isyu nga dili unta angay’ng hatagan og pokus.

Usa sa mga isyu nga angay unta hatagan og atensiyon sa katawhan mao kining balaudnon ni Sen. Panfilo “Ping” Lacson diin gi-propose nga librehon sa buhis ang mga local water district sama sa atong Metro Cebu Water District kon MCWD.

Ang tumong sa balaudnon (Senate Bill 3152) ni Lacson mao ang pagpalambo sa maong mga water district pinaagi sa paggamit sa kuwarta nga masalbar sa buhis ngadto sa mga development project sa maong mga water district.

Wala kaayo kini kahatagi’g halapad nga pagpahibawo ug pagtagad sa katawhan tungod kay nalubong kini sa mga menor nga butang nga maoy nakailog og dakung luna sa media.