12. Mineral water ug uban pa

Daghang mga tawo nga wala masayod kun unsang matanga sa tubig ang ilang giinom. Alang nila, wala na kini kinahanglana. Ang importante alang nila mao nga may tubig sila nga mainom.

Apan sa tinuod lang, kinahanglang masayod ta sa matang sa tubig nga atong giinom aron ato sab nga masayran kun unsa ang mga benepisyo nga atong makuha gikan niini.

Usa sa daghang matang sa tubig nga mainom mao ang mineral water. Kining maong tubig naggikan sa atabay o tinubdan sa ilawom sa yuta. Bisan mawagtang ang gagmay kaayong lugas sa yuta apan magpabilin ang mineral ug kini malakip pagsulod sa atong lawas sa higayon nga moinom tag mineral water.

Karon nga nauso na ang bottled water, usa sa gipangsulod og botelya mao ang mineral water. Ang tinuod nga mineral water magpabilin nga lab-as paglabay sa pipila ka adlaw human ablihi ang botelya sanglit wala man kini butangi og bisan unsang kemikal.

Labing maayo nga dili pasagdan ang botelyang may sulod nga mineral water sa dapit nga matandangan sa kainit sa adlaw. Mabuhi man god ang mga bakterya diha sa kainit.

Duna say gitawag nga spring, natural o purified water. Posibleng gikan ra sa gripo ang maong tubig. Gibutangan kini’g tambal o medisina nga pangontra sa mga bakterya. (Sunod: Distilled Ug Filtered Water)