Daghan na ang nahagit pagpakigsangka ni Pacquiao

Pagkakaron, aduna nay upat ka boksidor ang buot makigsangka ni Manny Pacquiao. Alang nila, usa kini ka dakung hagit, nga kun ilang mapilde si Pacquiao, makaangkon sila’g talagsaon nga dungog sa natad sa pamoksing.

Una, si Edwin Valero, lightweight champ sa Valenzuela, mihangyo kang Bob Arum, ang co-promoter sa Hatton-Pacquiao fight, nga ilakip siya sa talaan sa buot makigsangka kang Pacquiao. Si Valero naghupot og 25-0 card, pulos by knockout. Sa ato pa, sa 25 niya ka sangka, wala siyay pilde, ug ang tanan niyang kontra gipalukapa sa canvas. Kuyaw paminawon no? Mora sag kang Hatton nga sa layo pa, gipaabot nga magkadugo si Pacquiao. Miingon si Valero nga andam siyang magpasaka sa timbang, aron mo-qualify pagpakigsangka ni Pacquiao.

Ingonman, si Julio Cesar Chavez Jr, middleweight prospect, gusto sang makig-away kang Pacquiao. Anaa na sa talaan sila si Miguel Cotto sa Puerto Rico, Shane Mosley, ug ang mudaog unya sa bugno nila ni Floyd Mayweather Jr. ug Juan Manuel Marquez karong Hulyo. Sa ato pa, kun si Mayweather ang mudaog batok kang Marquez, siya si Mayweather maoy mahimong kontra ni Pacquiao.

Matud ni Arum, iyang konsultahon sila si Pacquiao mismo, ug Freddie Roach, kun kinsa ang gusto nilang kontrahon sa sunod nga sangka. Lagmit, kun si Pacquiao ang pabut-on, silang tanan iyang kontrahon – hangtud nga wa na gyuy mosukol niya – mo-retire as an undefeated world champ, unya …… maghugaw hugaw dayon sa politika sa tuyo paglinis niini.

Si Hatton, tapus sa kapildihan, miingon nga, he was absolutely devastated, maayong pagkaguba, maayong pagkahugno. “My head is in bits,” matud niya.

Ang nanan-aw sulod sa gym sa bugno nila ni dela Hoya ug Pacquiao miabot og 15,000, lakip na niini sila si Noli de Castro, Chavit Singson, Lito Atienza, ug uban pang mga milyonaryo sa atong nasud. Samtang sa Pacquiao-Hatton fight, miabot og 16,262 ka fans, lakip na usab niini ang mga lider sa atong nasud nga di makontento pagtan-aw lang sa telebisyon, bahala nag dili maka-quorum ang Lower House. 

Unya sa pay-per-view, miabot og 1.6million ngadto sa 2 million buys ang kita sa cable tv sa tibuok kalibutan, matud pa, fourth biggest ever in boxing annals. Ingon niini ang popularity karon ni Manny Pacquiao. Lagmit ma-surpassed niya ang bisan unsa nga boxing-related nga event sa kasaysayan sa pamoksing sa tibuok kalibutan.

Dili kay Philippine Hero lang, kondili, bayani gyud sa tibuok kalibutan. Apan, kun mo-intra sa politika, dihadiha dayon ma- wa na siya’y lami. Di ba, Dro? We hope dili siya madala sa mga hulhog ug ulo-ulo sa iyang mga tawo nga nag-alirong kaniya.