Maayo ba ni?

Gikonpirmar sa mga opisyal sa dakbayan nga ang One-Stop Towing Services nag-operate pagpangguroy og mga sakyanan nga nag-illegal park nga ilang masakpan bisan og walay kontrata sa City Hall.

Ang mga kritiko ni Mayor Tomas Osmeña mihulagway nga kwestyonable ug angay’ng manubag niini ang kadagkoan sa dakbayan, apan ang mga suod sa mayor miingon nga dunay provisional authority nga giisyu si Osmeña nga nagtugot sa towing company nga maka-operate.

Sa laing bahin, ang mga opisyal sa One-Stop Towing Services nangangkon usab nga duna sila’y kontrata sa dakbayan apan bisan sila si Konsehal Sylvan “Jack” Jakosalem ug Augustus Pe Jr. mitataw g’yod nga hangtud karon wala pa maaprobahi ang kontrata.

Sa duha ka towing companies nga gi-hire sa CITOM paghimo’g kampanya batok sa mga sakyanan nga ipataka lang og parking daplin sa karsada, ang Road Warriors Towing Services pa lang ang dunay kontrata sa dakbayan.

Basi sa pangangkon ni Tinago barangay konsehal Joel Garganera nga ang duha ka towing companies gipanag-iya sa suod nga mga higala sa mayor, ang dukomento nagpakita nga lahi ang ngalan nga gibutang sa dukomento.

Ang ubang opisyal miingon nga ang City Ordinance 1335 nagtugot sa mayor nga maka-designate og towing company o kaha indibidwal nga makaabang sa CITOM sa kampanya batok sa illegal parking.

Apan gihulagway usab kini sa mga kritiko sa mayor nga sayop nga pagpatuman kay matud nila ang gipasabot nga termino nga maka-designate, himoon lang kini human sa paghatag og pagtugot sa konseho.

Ang City Ordinance 2172 naglatid nga ang mayor makahimo pagsulod og kontrata sa mga towing companies kun irekomendar kini sa CITOM Board nga siya usab maoy chairman ug hatagan kini og paborable nga resolution sa konseho.

Ang usa sa mga suod kaayo nga konsehal sa mayor, si Konsehal Pe namahayag nga sayop ang pamahayag nga gi-by pass ni Osmeña ang konseho paghatag og provisional o temporary authority sa One- Stop Towing nga maka-operate.

Apan sa dukomento hinuon nga giisyu ni Osmeña, wala itataw nga ang giisyu sa mayor usa ka provisional authority o kaha temporaryo. Nagkanayon ang kamandoan sa mayor nga “I hereby authorize and designate the One-Stop Towing Services, a private towing company... to conduct towing activities for and in behalf of the City of Cebu effective immediately.”

Sila si Garganera ug Atty. Ramsey Quijano, ang presidente sa Integrated Bar of the Philippines, mitataw g’yod nga illegal ang gihimo sa mayor. Sila si Quijano ug Garganera gikiha sa CITOM ug sa One- Stop Towing tungod sa pagbabag nila nga maguyod ang sakyanan nga nag-illegal park didto duol sa Cebu Doctors Hospital niadtong Abril 8.

Bisan pa niining mitumaw nga inpormasyon nga wala diay kontrata ang maong private towing company, si acting mayor Michael Rama wala gihapoy plano nga ipahunong niya ang operasyon sa One-Stop towing. Gihulagway hinoon sa uban nga ang rason niini mao nga mahadlok si Rama nga masuko kaniya si Osmeña. Nagtoo sila si Garganera nga si Osmeña ug ubang opisyal, apil si CITOM executive director Arnel Tancinco, nagdawat g’yod og bahin gikan sa kita sa towing companies.

Ang towing companies mokolekta og tag kapin sa P2,000 nga towing fees sa mga tag-iya og “four wheeled vehicles” nga ilang maguroy, ug P1,500 sa mga motor. Ang dakbayan makadawat na lang og 25 porsiento nga bahin sa kita sa towing companies.

Matud ni Rama nga kay moabot na man si Osmeña dinhi sa dakbayan karong Mayo 26, ang mayor na ang mohimo’g hukom kun papadayonon ba niya ang operasyon sa mga towing companies nga gisaway sa daghang motorista.