Ang Mindanao, mas daghan og players kay sa Sugbo?
Maayo tingale i-review ni Kanapi ang gidaghanon sa mga players aron makatukma siya sa iyang gipanubag. Kun wala siya masayod sa tukmang gidaghanon, maayong sugdan niya og tuon kini.
Bisan sa gipasabot ni Kanapi, klaro man kaayong giilad lamang kitang mga Sugboanon niining tulo ka higanteng kompaniya sa lana.
Naglibog usab ko nganong karon lang nangreklamo kining mga hanggaw’ng mga negosyante nga kaniadto ra man unta nagkadeperensiya ang presyo sa mga gasolinahan dinhi kay sa didto sa Manila.
Maayo na lang kay adunay isog nga opisyal sama ni Garcia nga milaban natong mga Sugboanon paggukod sa mga higanteng kompaniya sa lana nga nanagkunsabo pagkontrolar sa presyo sa petrolyo.
Epekto hinuon kini sa Oil Deregulation Law. Ang maong balaod tataw kaayong gi-abusohan sa mga higanteng kompaniya sa lana.
Ambot unsa na kahay resulta sa pagtuon sa Malacañang sa maong balaod tungod sa sugyot nga wagtangon kini tungod sa pag-abuso na sa mga higanteng kompaniya sa lana tungod sa deregulasyon sa industriya.
* * *
Kun ingon kalugak ang baruganan ni acting Mayor Michael Rama sa kontrobersiyal nga pagpamangga sa towing truck ngadto sa usa ka motorista nga wala mag-helmet, mosamot ka-gara kining mga towing firm nga karon labaw pa sa mayor ka-hambugero kun magtuyoktuyok sa dakbayan.
Wala na kinahanglana pa ang imbestigasyon nga gimando ni Rama kun desidido na kini nga ibilin ang serbisyo sa One-Stop Towing Services ug Road Warriors Towing Services. Walay kapaingnan ang imbestigasyon kun walay plano ang acting mayor pagsilot mismo sa towing firm nga nakasala.
Dili lang kay si Freddie Teopez ug Kagawad Joel Garganera sa Tinago ang gika-engkuwentro nianang mga kagwang dagko sa One-Stop ug Road Warriors.
Kun wala pa ma-ospital si Teopez human gibanggaan ang motorsiklong iyang gisakyan sa towing truck, dili mapublikar ang iyang pagkabiktima sa kamaldito nianang mga towing crew nga gipang-accredit sa City Traffic Operations and Management (Citom).
Kun dili pa sikat nga political figure si Garganera, dili matuki sa publiko ang insidente diin siya ug pipila ka mga sakop sa towing firm hapit magkasinukmagay.
Ang desperadong tubag sa One-Stop pinaagi sa ilang operations officer nga si Efren Navales nga si Teopez ang mibangga kahibulongan kaayo.
Kinsa man diay ang nanggukod, ang towing truck sa One-Stop o si Teopez?
Kun miingon si Navales nga ang ilang truck ang gibanggaan ni Teopez, si Teopez diay ang nanggukod sa towing truck? Nganong manggukod man si Teopez? Iyang i-tow ang towing truck sa One-Stop?
Binulay-og nga argumento.
Sumala pa sa report, ang towing truck sa One-Stop ang migukod kang Teopez human kini mipaturatoy og padagan sa dihang gisita kay lagi wala kini magsul-ob og helmet.
Nayabag na! Hasta ang wala mag-helmet nga motorista i-tow diay sa One-Stop Towing Services.
Tan-awa ninyo, gi-accredit sa Citom ang One-Stop aron mangguroy og mga motorsiklo ug mga sakyanan nga magpataka og parking, walay labot sa ilang trabaho ang pagpanakop og traffic violators, ilabi na ang wala mag-helmet.
Kabalo ka ana, Mr. Navales?
Unya nganong nanggukod man kamo og wala mag-helmet?
Dagko kaayo kamo og paningil sa inyong pangguroyon, unya P100 ra ang mapunta sa panudlanan sa siyudad.