Mga gahi'g ulo

Siyaro og wala g’yod makakuha og leksyon kadtong mga drayber nga nadakpan sa operation sa mga sakop sa Land Transportation Office-7 didto sa duol sa Marco Polo Hotel niadtong Lunes sa hapon.

Ako maoy nag-request nga himoan og operation ang maong dapit tungod sa mga drayber nga daw sa wala na g’yoy tahod sa atong balaud sa transportasyon.

Hinuon, gihangyo nako ang mga LTO agents nga dili lang estriktohon ang masakpan nga magpasakay og subra sa duha sa motor kay gisabot namo nga panginabuhian nila ang pagpamasahero pinaagi sa gitawag og “habal-habal.”

Untol lagi ang mga drayber nga nasayod nga ang ilang multahan sa wala pagsul-ob og crash helmet, P1,776 ug kapin sa P1,800 kun walay side mirrors ang ilang motor.

Duna sa’y drayber og PUJ nga nadakpan kay wala magsuga samtang nagpadagan.

Sayonan ka, dihang gipangutana kun nganong wala siya magsuga miingon ang drayber nga extrador ra kuno siya ug wala siya masayod asa ang switch sa suga.

Duna pay usa ka drayber nga nadakpan nga misuway pagtunol og kwarta isip suborno sa nagdakop kaniya.

Ang naghimo og operation kaniadtong Lunes mga deputized agents sa LTO nga dili gayod mangwarta sama sa ubang mga traffic enforcers.

Dili panghambog, ang mga LTO deputized agents dunay mga maayong trabaho nga maarang-arang og sweldo, ingon man ang uban kanila dunay mga maayong negosyo.

Kadtong drayber nga misuway pagsuborno, pwerteng uwawa dihang ang LTO agent nga midakop kaniya nagpaila sa tinuod niyang pagkatawo.

Usa ka drayber og van, nadakpan usab diha sa eskena Manalili ug P. Burgos nga wala motahud sa “stop signal.” Ang tawo nga diha maglingkod sa “front seat” maoy midali-dali paghangyo sa LTO agent nga dili lang unta dakpon ang iyang drayber.

Siya kuno ang nagsugo sa iyang drayber nga moderitso lang pagpadagan bisan og stop signal kay nagdali siya. Ikaduha niyang rason nga giinitan kuno ang iyang apo.

Pastilan, dili na ba lang g’yod kamo makapaabot sa pipila ka segundos aron mo-go ang signal? Ayaw g’yod kamo pag-abuso pagmaneho sa inyong sakyanan kay dili tanang enforcers ang madala sa inyong mga haylo.

Awhagon nako ang mga sakop sa LTO Task Force Alpha nga hingusgan ang kampanya batok sa mga drayber aron magtudlo kanila og leksyon.

Ang akong baruganan mao kini. Dili angay’ng kaloy-on ang mga drayber nga abusado nga bisan nasayod kun unsa ang balaud, dili gayod motuman.

Sayonan ka, ang mga drayber og “habal-habal” dili magsul-ob og helmet, ang ilang motor walay side mirrors unya mopadagan pa sugat sa agianan sa mga sakyanan.

Ang ubang drayber bisan og dunay mga plastic nga “road barriers” nga gibutang taliwala sa karsada nga nagpasabot nga gidili ang pag-agi, milagbas g’yod nga makahasol sa ubang sakyanan.

Kun ikaw ang pangutan-on, angay ba nga kaloy-on kining maong matang sa mga drayber?

Awhag nako sa mga pasahero, ayaw kamo pagsakay sa mga PUJ nga dili magsuga samtang magpadagan diha sa karsada.

Sultihan ko kamo, malooy man unta kita sa mga PUJ drivers kay ang ilang kita sa usa ka adlaw nga pagpamasahero, usahay P400 lang ug kun madakpan, mas daku pa ang kantidad.

Apan unsaon man nga gahi man kaayo sila’g ulo? Kining akong kulum gigamit ko kini sa pagsigi og balik-balik sa mga transportation issues aron pagtabang ninyo, apan gahi gihapon kamo pasabton.