Ang suwertres sa Bohol

Mingsiaw na pagmaayo sa lalawigan sa Bohol ang illegal nga sugal nga suwertres. Ang maong sugal gitawag og suwertres tungod kay gibasi ang resulta niini sa suwertres lotto. Ang suwertres nahimong sugal ug illegal tungod kay ang mga misalmot niini wa mamalit og tiket sa mga lotto outlet hinoon didto sila mamalit sa mga batos ug hinanib sa mga nagpadagan sa illegal nga sugal.

Sigon sa hunghong sa akong mga higalang dewende sa Bohol nga misiaw pagmaayo ang nahisgutang illegal nga sugal tungod kay ang mga opisyal mismo sa kalungsuran ug kabaranggayan ang nagpadagan sa maong sugal ug kun dili man sila ang nangunay, ang ila mismong mga kabanay ang nagpadagan niini.

Ang hunghong sa akong mga higalang dewende sa Bohol napamatud-an dihang ang Barangay Kapitan sa Mansasa, Tagbilaran City ang nadakpan sa mga sakop sa Regional Intelligence Division sa kapulisan sa Rehiyon 7 ug nakuhaan og sobra sa tunga sa milyon nga kantidad ug mga kagamitan sa illegal nga sugal nga suwertres.

Tungod sa pagkusog ning maong matang sa sugal nga gikaboangan sa mga Bol-anon, giawhag sila ni gobernador Erico Aumentado sa nahisgutang lalawigan sa paghunong na sa maong sugal. Samtang basi sa pag-angkon sa director sa kapulisan sa lalawigan sa Bohol Eduardo Ingking nga lisod sulbaron ang maong matang sa sugal tungod sa kakuwang sa kooperasyon sa mga Bol-anon gisugyot karon ni kongresista Jala sa ikatulong distrito sa Bohol ang pagpadagan sa mga small town lottery. pagkatoytoy!

Ako nagduda nga si gobernador Erico Aumentado, kongresista Jala ug Sr. Supt. Eduardo Ingking toa makapusta sa mga sugarol ug mga nagpasiugda sa sugal. Kay nganong dili man imando sa gobernador ngadto ni Ingking ang paggukod sa mga nagpasiugda sa sugal nga suwertres? Ina kay sumpoon ang sugal magpasiugda man hinoon og laing sugal si kongresista Jala. Ingon si Sr. Supt. Eduardo Ingking nga way kooperasyon ang mga Bol-anon sa pagsumpo sa illegal nga suwertres, nganong naabot man gani sila sa Sugbo aron lang sa pagpaabot sa suliran sa illegal nga sugal nga suwertres ngadto sa kadagkoan sa atong kapulisan sa rehiyon? Nganong nadakpan man gani sa mga police sa Rehiyon ang kapitan sa Barangay Mansasa sa dakbayan sa Tagbilaran? Pagtsur mo oi.