Special court sa media

Nindot tinuod ang sugyot ni Senador Loren Legarda nga kinahanglang duna g’yoy usa ka special court nga mugnaon nga tahasan lang g’yod paghusay sa mga kaso nga naglambigit sa mga pagpamatay sa mga sakop sa media.

Hinuon, daku pa kaayo kini nga tun-anan sa mga kadagkoan sa Supreme Court kay ang tumong maayo, apan ang pangutana, asa man magbase ang mao nga special court?

Kun anhi sa Sugbo magbase ang special court sa mga kaso sa media, walay problema kay namatud-an na man nga ang mga huwes dinhi takus mopahamtang og silot bisan kinsa pa ang nalambigit nga akusado.

Kabahin sa mga sakop sa media, dili usab malisang ang mga Sugbuanong sakop sa media bisan kun dunay hulga kanila gikan sa mga akusado.

Daghan na nga mga kaso nga naglambigit og pagpamatay sa media nga gibalhin ang husay sa kaso dinhi sa Sugbo. Dunay mga kaso nga gikan sa Mindanao, Manila ug sa Western Visayas.

Kun dunay special courts nga pagamugnaon nga mohusay sa kaso ra g’yod nga naglambigit og media, mopaspas g’yod ang pagkahuman sa maong mga kaso kay mahimo man nga adlaw-adlaw dunay hearing.

Ang pagbalhin sa husay sa usa ka kaso usahay ibasi sa kapeligro sa kinabuhi sa mga witnesses. May mga saksi man god sa hitabo nga kun magpabilin sila sa dapit nga nahitaboan, patyon sila sa mga kriminal.

Nahinumdom mo sa kaso ni journalist Edgar Damalerio didto sa Mindanao? Ang iyang saksi gipatay ra sa mga kriminal sa wala pa gani kini makaatubang sa korte. Kini maoy rason nga gibalhin ang hearing sa kaso dinhi sa Sugbo.

Aw tuod man, nakonbikto g’yod ang polis nga maoy mipusil ug mipatay kaniya apan daghan pang mga kaso nga naglambigit og media ang pending pa sa korte.

Atong awhagon si Loren nga lihukon niya kini kay tan-aw nako ang mga sakop sa media mosuporta g’yod niining maong lakang.

* * *

Sayop diay ang pamaagi nato sa pagdakop sa mga libudsuroy nga iro. Gitataw kini kagahapon ni Rahul Sehgal, ang pangulo sa Humane Society International dihang nahinabi sa mga reporters sa City Hall.

Aw bisan si Dr. Alice Utlang nga maoy hepe sa Department of Veterinary Medicine miangkon nga sayop ang ilang pamaagi nga ang ilang “dog catchers” migamit ra og alambre nga bitik.

Ang husto diay nga paagi sa pagdakop sa mga iro, apil na ang mga libudsuroy, mao ang paggamit og “net” nga mora ba og sapyaw aron dakpon ang mga iro. Unya ang pagpatay usab nga gamitan og aso gikan sa makina sa sakyanan, sayop usab.

Matud ni Sehgal nga ang husto nga paagi mao nga injectionan usa kini og intra-venus fluid aron dili makabantay ang hayop sa dili pa patyon. Ah, mora man og susama sa pagpatay ni Leo Echegaray!

Karong buntag, sugdan ang duha ka adlaw nga seminar sa dakbayan, pero anha kini himoa sa Kapitolyo. Wala ba kamo mahibulong? Kontra sila si Tommy ug Gwen, apan ang kalihukan sa dakbayan adto himoa sa Kapitolyo.

Matud ni Dr. Utlang nga nananghid g’yod siya ni Tommy kun mosugot ba nga adto ang kalihukan ipahigayon sa Kapitolyo. Ingon kuno si Tommy, Okey, No problem. Sinugdanan na ba kini sa ilang panag-uli?

Bitaw, usa sa rason niini kay ang maong kalihukan tambungan man usab sa mga municipal veterinarians ug sa ilang mga dog catchers.