EDITORYAL - Problema sa tindero'g baboy

Nagpadayong naapektahan ang mga manindahay og karneng baboy sa kamerkadohan dinhi sa dakbayan sa Sugbu human migawas ang taho bahin sa swine flu.

Kini suma sa balita nga napatik dinhi ning atong mantalaan. Bisan pa og giusab ang ngalan sa gikahadlokang swine flu virus ngadto sa Influenza A H1N1, ang kadaghanan sa mga konsumidor milikay gihapon sa karneng baboy.

Nasugdan na man gud sa mga balita ang swine flu, mao nga nagpabilin kini sa hunahuna sa katawhan.

Angay’ng mangitag lakang ang kagamhanan sa pagtabang sa mga manindahay’g karneng baboy pinaagi sa halapad nga information campaign diin pasabton og maayo ang konsumidor bahin niining gikahadlokang virus.