Palusot sa argumento

Daghang mga drayber o kaha tag-iya g’yod mismo og mga sakyanan nga yano-yano ra nga mogamit sa ilang sakyanan bisan og expire na ang rehistro.

Wala man god sila masayod nga daku na kaayo karon ang multa kun sila masakpan nga mi-drive og sakyanan nga “expired” na ang rehistro.

Ubos sa lagda nga gilatid sa LTO Department Order 2008-39, P2,000 ang multa kun ang drayber madakpan nga expired ang rehistro sa iyang sakyanan.

Kana kun gihimo kini sa drayber nga walay kalibutan ang tag-iya sa sakyanan, apan kun ang drayber mao ra usab ang tag-iya, aw gamay ra ang multa, P4,000.

Buyno, anam-anamon lang nato kay mahurot usab ang luna sa atong lindog sa mao ra nga isyu.

* * *

Ang mga abogado sa Kapitolyo mibarug g’yod nga duna sila’y rason nga dili mapugngan sa dakbayan ang pagmugna nila og mga commercial project diha sa ilang mga lote nga nahimutang sa Banilad.

Ang argumento god sa mga abogado sa dakbayan nga kaniadto kunong 1918, ang gobernador heneral nga si Francis Burton Harrison mipirma og kamandoan nga ang lote nga napanag-iya sa Kapitolyo gikan sa Banilad Friar Lands, gamiton ra g’yod sa public purpose.

Wala kini ilimod sa mga abogado sa Kapitolyo, apan mihatag lang og dugang pagpasabot nga kaniadtong Marso 15, 1957 si Presidente Ramon Magsaysay miluwat og laing kamandoan nga nag-revoke na sa kamandoan ni Harrison.

Matud pa nga gitugot na ni Magsaysay nga ang maong yuta nga napanag-iya sa Kapitolyo gikan sa Banilad Friar Lands nga 63 hektareyas mahimo na nga gamiton sa laing kagamitan, gawas sa public purpose.

Kini maoy managlahi nga argumento sa mga abogado nga angay’ng adto ra husaya sa korte.

* * *

Malipayon kaayo ang pamilya ni Engr. Ernesto Guidoquio diha sa barangay Kasambagan nga nasayod nga giabswelto siya sa Supreme Court sa kaso nga paglapas sa anti-graft and corrupt practices act.

Opisyal sa National Power Corporation kaniadto kini si Engr. Guidoquio, apan gitaktak siya sa katungdanan human pasakai og kaso kay matud pa nakalapas sa balaud.

Karong bag-o lang, giusab sa Supreme Court ang hukom sa Sandiganbayan nga mihukom nga siya sad-an. Ang mga paryente ni Engr. Guidoquio mitug-an nako nga buotan kining maong engineer.

Congratulations sa imong pagka-abswelto engineer. Basaha ang balita kabahin niini sa igsoong mantalaan sa Banat News, ang The Freeman.

* * *

Ang yuta nga kaniadto gipanag-iya kaniadto sa tag-iya sa Citi-Center Commercial Complex, ug karon hingpit na nga napanag-iya sa dakbayan sa Sugbo, maayong gamiton isip parking area.

Kapahimuslan pa kini sa dakbayan kay sigurado man nga daghang mga tag-iya og sakyanan nga mga tinun-an sa duol nga mga tunghaan, anha mo-parking.

Sa ingon nga paagi, maminus pa ang mga illegal nga kalihukan diha sa Kamagayan. Paita bitaw anang lugara uy. Illegal nga sugal, drugas, protitusyon ug unsa pa ning uban, sagad naa diha.

Ang kanhi merkado gipuy-an na man karon sa daghang mga squatters. Ang report nga miabot nako mao nga dunay tawo nga maoy nangolekta sa abang gikan sa mga namuyo.

Atensyon mga opisyal sa City Hall, kini maoy himoi ninyo og rekomendasyon. Atty. Benjie Militar, isip consultant on real property, himoi kini og sugyot.