Dugang kasayoran sa cyber sex

Niadtong Pebrero 13, 2006 napatik dinhi sa akong lindog sa Banat News ang dason sa akong gisulat niadtong Pebrero 3, 2006 bahin sa cyber sex sa Opon. Usa ka magbabasa nga nanag-iya sa cellphone number 0926-4733779 mitaho nga adunay nahitabong cyber sex operations diha gyud mismo sa merkado sa Opon. Maayong masusi kun unsa gayod kini ka tinuod.

Dili kay kana ra. May lain pang texter nga mikompirmar nga tinuod gayod nga may operasyon sa cyber sex diha sa Opon. Para nako, mas komprehensibo kining kasayoran nga iyang gihatag kanako.

Ang iyang text nagkanayon: “Good day, Sir. Tinuod gyud nga naay cyber sex sa Opon. Naa bitaw koy kauban sa abangan mag-cyber sex man sa internet aron lang padad-an og dollars sa Amerikano. Naa may Amerikano nga mohatag tuod og dollars basta makig-sex sa internet. Mao nay buhat ron sa ubang disperada sa kalisod pero dili pud ang tanan. Naa gyuy uban nga mobuhat na lang sa dili angay buhaton kay dili man gusto nga makasapi pinaagi sa maayong panguwarta sa paghago ug pagpagawas sa singot. Gipakabarato na lang intawon ang atong mga babayeng Pinay kay daghan na kaayo ron ang nag-internet nga mga bata pa kaayo. Naa poy mga edaran na, kanang ganahan nga makapares og Amerikano ipaagi lang sa internet.” -- 0910-6098461

Daghang salamat sa kasayoran nga imong gihatag kanako. Kining maong kasayoran makapasamot sa pagduda nga may cyber sex gayod nga nahitabo diha sa Opon. Kining maong kasayoran dili angay ipakagamay sa atong mga awtoridad. Labing maayo nga ilang sutaon kun tinuod ba gayod kini.

Daghan na kaayo ang miabot kanako nga sumbong nga ingon niini busa akong nakita nga angayan na gayod nga mohimo’g lakang ang mga awtoridad mahitungod niini. Mas maayo kun ila kining himoan og pakisusi aron atong masayran kun unsa gayod kini ka tinuod.

Sa pagkakaron, dili lang una ko mokomentaryo mahitungod niini. Dili ko mokondenar ni bisan kinsa kay wala pa man kita’y matumbok nga responsable. Mao lagi nga angayan kining susihon sa mga awtoridad.

Sa pagkakaron magpaabot lang una ko og dugang pang mga kasayoran nga ipadangat ngari kanako kalabot sa alegasyon nga may cyber sex operations diha sa Opon. Wala pa gihapon ko motuo niini. Pero kun tukion nato pag-ayo, may sukaranan pud nga magduda ang katawhan. Dili ba?

Sige lang. Kun unsa man gayod kini ka tinuod, masayran nato kini sa umaabot nga mga adlaw. Malipay kita kun dili kini tinuod. Pero makapahisagmuyo pud kun tinuod man ugaling kini.

* * *

(Sumbong ug reklamo? Text sa 0910-8105522).