Unpatriotic Martin

Dismayado ang National Historical Institute ingon man ang junta provincial sa Sugbo kang Martin Nievera tungod kay dili mao ang iyang pagkanta sa atong nasudnong awit atol sa away ni Pacman ug Hitman. Tungod sa tinuyo nga sayop, gidemanda sa National Historical Institute ngadto kang Martin Nievera ang pagpangayo og pasaylo ngadto sa publiko. Apan nagdumili ang singer sa paghatag sa gidemanda sa National Historical Institute. Matud pa niya, wa siya mobolontaryo sa pagkanta, personal siya nga gipili ni Pacman ug kay gipili man siya niini, nagtoo siya nga gipili siya ni Pacman tungod kay ganahan kini sa iyang istilo sa pagkanta. Makalolooy nga Martin Nievera. Kay sikat, migahi ang ulo. Nagtoo nga giganahan ang mga tawo sa OA o over-acting niyang pagkanta. Nagpapiyong-piyong, nagpadaut-daot pa sa iyang dagway pagkanta sa atong nasudnong awit unya sayop diay to ang tonada. Sa mga bogoy pa nga naglagot, pagka maayo gyod kunong bitayon ni Martin sa “bayang magiliw” ug labayon sa “erase the board”.

* * *

Panahon na seguro nga tinud-on sa National Historical Institute ang pagpasaka og kaso batok niadtong mga mag-usab sa tonada sa atong nasudnong awit ug mas labing maayo kun himuon nilang sample si Martin Nievera aron wa nay mosunod sa iyang gihimo.

Dili ikalimod nga maayo ug adunay iyang kaugalingong istelo sa pagkanta si Martin Nievera apan wa unta kini niya gamita ngadto sa atong nasudnong awit agi og respito sa atong balaud ug sa composer niini.