Isnatser gawas sa school

Usa sa paboritong biktimahon sa mga badlongon sa katilingban, partikular na sa mga isnatser, mao ang mga estudyante. Nasayod man god ang mga isnatser nga halos tanan sa atong mga estudyante karon nagbaton og cellphone. Ug ang mga estudyante maoy mas sayon ug mas dali nilang biktimahon.

Usa ka estudyante nga nanag-iya sa cellphone number 0915-7754838 mi-text kanako tungod kay aduna siya’y concern alang sa mga kauban niyang estudyante sa maong tunghaan. Ang maong texter miangkon nga usa siya sa nabiktima sa mga isnatser nga mag-atang diha sa gawas sa maong eskuylahan.

Kun adto pa sa sulod sa nahisgotang tulunghaan ang mga tinun-an, luwas sila gikan sa mga badlongon sa katilingban. Walay makapanghilabot kanila samtang atua pa sila sa sulod. Ang risgo anaa sa gawas, sa higayon nga mogawas na sila sa school campus. Sila ray gibantayan sa mga badlongon.

Sumala sa atong texter, ang mga isnatser adunay watcher nga maghulat o magpaatbang sa gawas sa main entrance sa tulunghaan. Mao kini sila ang motembre ngadto sa mga isnatser ug mangunguot kun kinsa ang estudyante nga maayong biktimahon. Igmat kaayo kining mga tawhana.

Partikular nga gitumbok sa atong texter ang dapit sa may eskina sa Colon ug D. Jakosalem nga maoy giestambayan niining maong mga watcher. Pero posibleng anaa usab kining mga tawhana sa ubang mga dapit sa dakbayan nga duol og eskuylahan. Angay gayod kining bantayan.

Matud pa sa atong texter nga kun adunay polis nga idestino sa maong lugar nga dili magsul-ob og uniporme kondili mag-civilian lang, seguradong masakpan gayod kining maong mga badlongon sa katilingban.

* * *

Sa laing bahin, ang atong texter nga nanag-iya sa cellphone number 0919-8986317 mitaho kanako nga aduna nay nagpakaylap og mini nga kuwarta dinhi sa lalawigan sa Sugbo. Maayong sutaon kun unsa kini ka tinuod aron makabantay ang atong kaigsuonan.

"usa ako sa nabiktima sa mini nga P1,000," nagkanayon ang atong texter.

Kinahanglan nga magbantay niini ang atong kaigsuonan. Dili maayo nga anha na kita manguros human kita maigo sa kilat. Karong panahona, dili gayod maayo nga mokompiyansa kita kay hilabihang pagdagsang sa mga badlongon sa katilingban nga anaa sa atong palibot.

(Sumbong ug reklamo? Text sa 0910-8105522).