Polis nga manion

Kausa niana nakahisgot ko dinhi ning lindog mahitungod sa polis nga hambogero ug abusado. Paggawas sa mao kong sinulat, daghan kaayo ang mipadangat sa ilang reaksiyon ug mikompirmar nga duna gyuy polis nga abusado ug hambugero. Giulan sa text messages ang akong cellphone kay daghang mga magbabasa ang mimatuod nga sila mismo nakasaksi sa pagpangabuso sa pipila ka badlongong polis.

Apan ang usa sa mga text nga nakakabig og maayo sa akong pagtagad mao ang gikan sa cellphone number 0928-4641529. Ang iyang text nagkanayon: “Good day, Sir. Usa ko sa daghang magbabasa sa Banat News, labina sa imong mga column. Kada adlaw gyud ko magbasa niini. Naghisgot man ka mahitungod sa polis nga hambog, naa sad ko’y ikapaambit bahin niana. Ang akong nakita di lang hambog nga polis, abusado gyud. Nahitabo kini atol sa pista sa Opao, Mandaue City. Dihay nag-away. Mibiya sa dapit ang usa sa nalambigit sa away. Pero nibalik siya nga nagdala nag polis kay amigo man sila. Mingaw na ang dapit nga giawayan. Pag-abot sa polis, tuktok dayon siya sa usa ka gate. Migawas ang tagbalay ug nangutana unsay tuyo sa polis. Imbes motubag, gitionan hinuon siya sa polis. Gikasahan pa sa armas. Tagak-tagak pa ang bala sa .45. Gikuyawan ko nga nakakita kay basin og mobuto. Hubog ra ba ang polis. Misulod gyud ang polis pero wala man siya’y nakita nga dakponon. Puyde ba diay nga manion siya’g armas nga dili man kriminal ang iyang tuyo? Upawon ang maong polis, taas nga tawo.”

Mora’g wala mahisubay sa hustong proseso ang gibuhat sa maong polis. Kun maoy iyang gipangita ang tawo nga gika-engkuwentro sa iyang amigo, dili siya angay magpataka lang og sulod sa balay ni bisan kinsang tawo ug manghadlok sa tagbalay. Abuso ang iyang gibuhat kun tinuod man ang asoy sa atong texter, labina nga hubog man kaha siya atol sa iyang paghimo sa ingon. Pang-harass ang iyang gibuhat. Espoko mo bay tionan niya ang tagbalay sa walay daghang pangutana o estorya?

Maayo unta’g nakuha pa sa atong texter ang ngalan sa maong polis. Nagtuo kong may dag-anan ang tagbalay nga gitionan sa maong polis nga abusado kun mopasaka siya’g reklamo. Ang maong polis angay gyud isumbong ngadto sa iyang labaw.

(Sumbong ug reklamo? Text sa 0910-8105522).