Manghamer

Dugay na akong nakadawat niining maong reklamo. Wala lang nako mahatagi dayon og pagtagad kay dili man sab klaro ang detalye sa reklamo nga gipadangat. Pero karon nakahukom kong palutson na kining maong reklamo kay ingon sa daghan na ang napuwerhisyo niining mga driver nga gipasanginlang "manghammer."

Usa ka magbabasa ning lindog mi-text nga nagkanayon: "Good day, Sir. Moreklamo mi bahin ining mga driver sa tricycle diri sa Cabancalan, Mandaue tumoy kay sige lang og panghamer kanang mga tawhana labina kana si Sanny. Suwapang kaayo. Dili gyod makiangayon ilang gibuhat." -- 0918-4542709 (Sent: 09:05:55am--September 23, 2008)

Nagtuo ko nga ang labing maayong buhaton aron mahilot ug mahapsay kining maong problema mao ang pagpadangat og reklamo ngadto sa barangay. Mas maayo gyod nga masayod ang mga brgy. opisyal ning maong problema aron kini mahusay ug mapangitaan og solusyon aron hapsay na ang inyong pagpamasahero diha.

Kun walay alibyo, i-refer ninyo kini ngadto sa traffic division sa Mandaue City o ba kaha ngadto sa city councilor nga maoy naghupot sa committee on transportation. Kana lang una ang akong ikasugyot.

* * *

Niay dugang sentimento sa atong mga motorista kalabot sa mga lagda nga gipatuman sa LTO:

"Good day. Unsa man kahay sala ning mga motorsiklo nga mao may giinitan pag-ayo sa LTO ug DTI? Ang ubang matang sa mga sakyanan wa man lagi lisod-lisora. Kadaghan sa mga multicab, awto ug ubang sakyanan. Wa man ta kadungog nga gipangdakop kay gipang-usab ang mga desinyo. Bias man ang gahimo ini nga balaod." -- 0920-6364242 (Sent: 08:53:52 am--September 23, 2008)

"About LTO. Kitang mga Pinoy hilig kaayog pang-usab. Wa ba diay tay katungod mopaangay sa atong gusto? Kinahanglan pa bang permiso gikan sa LTO? Aron makasapi na pod sila?" -- 0919-6603847 (Sent: 10:08:20am--September 23, 2008)

* * *

 (Sumbong ug reklamo? Text sa 0910-8105522).