EDITORYAL - Angay gihapon pahalipayan si Gerry

Si Gerry Peñalosa napilde sa iyang pakigsangka batok ni Juan Manuel Lopez didto sa San Juan, Puerto Rico. Bun-og siya. Gipaundang na lang sa iyang trainer sa ikasiyam nga round.

Apan angay gihapon nga hatagan og luna si Gerry sa listahan sa mga dalaygong Pinoy nga boksidor. Kini tungod sa iyang kaisog ug sa iyang paninguha nga makatampo sa pagpauswag sa natad sa pamoksing dili lang sa atong nasud kun dili usab sa tibuok kalibutan.

Tulo ka titulo ang naangkon ni Gerry ug ang usa niini iyang nailog sa dihang dako na siya’g pangedaron nga, suma pa sa uban, tiguwang na.

O, bisan sa iyang kaparotan didto sa Puerto Rico, angay gihapong pahalipayan si Gerry Peñalosa gumikan sa hataas nga lugar sa pamoksing nga iyang naabot.