Mga bayot nga bantayanan

Usa nako ka higalang magtutudlo sa usa sa mga tulunghaan sa Talisay City mipahibalo nako nga adunay mga bayot nga mangingilad nga naglihok sa maong dakbayan karon. Usa sa nabiktima sa maong mga bayot mao ang silingan mismo sa akong higala.

Ang estilo sa modus operandi ning maong mga bayot mao nga manungko sila sa kabalayan aron kunohay mamaligya sa dala nilang produkto nga toothpaste. Sa higayon nga makombinser ka sa pagpalit, dili dayon nila ihatag ang produkto kay ang gidala nilang produkto sample lang diay ug alang lang sa demonstration.

Nga sa ato pa, paorderon ka pa sa produkto nga imong nagustohan. Pabayron ka nilang daan sa kantidad sa produkto nga imong giorder. Hatagan ka pa kunohay og claim stab nga mao kunoy imong ipakita sa maghatod sa imong giorder nga produkto. Inigkaugma (kuno) dayon ihatod ang produkto.

Pero abtan ka nalang og siyam-siyam dili gyod moabot ang maghatod sa giorder nimong produkto. Usik lang ang imong gibayad. Pero tungod kay maayo sab nga mobulatik ang bayot nga nagkombinser kanimo, maong mibayad ka sa produkto nga dili nimo makuha dihadiha. Sa laktod, nailad ka.

Aron malikayan ang pagkailad, labing maayo nga magbantay. Kun may estilo sa approach nga ingon niini nga iyang masugatan, labing maayo nga dili na lang kamo motubay sa pagpakigsulti sa tawong makighinabi ninyo aron pagseguro nga makalikay kamo sa pangilad. Mas maayong magbantay gyod kanunay.

* * *

 (Sumbong ug reklamo? Text sa 0910-8105522).