Wala pa gihapon matapos ang pagpanglawgaw sa mga Garcia sa joint-venture agreement nga giapilan sa kagamhanan sa dakbayan sa Sugbo ug sa Filinvest Land Inc. pag-ugmad og luna sa South Road Properties (SRP).
Milampos gyod sila paggamit sa ilang impluwensiya didto sa Kongreso. Bisan unsaon nila og pangulipas nga dili pagpaka-ulaw sa dakbayan sa Sugbo ang privilege speech ni Kongresista Pablo John Garcia, walay laing kamatuoran nga milutaw, kita lang gihapong mga Sugboanon ang nanglipaghong sa kaulaw tungod sa ilang gibuhat.
Ang pagsaway sa joint venture agreement sa FLI ug City Hall pinaagi sa privilege speech didto sa Kongreso ra ba diay ang bugtong kadangpan sa Kapitolyo aron kuwestiyonon ang kasabutan?
Nganong wala naman lang sila modangop sa korte nga maoy adunay gahum pagsulbad og mga aktuwal nga mga kontrobersiya sa isi’g ka habig?
Kun mahinayon ang congressional inquiry tungod sa privilege speech ni Pablo John, unsa may mahitabo sa joint venture agreement? Undangon? Putlon? Aron ihatag na lang sa Kapitolyo?
Makapila na gipasabot sa mga opisyal sa kagamhanan sa dakbayan nga dili kuwalipikado ang Kapitolyo pag-apil sa subasta tungod kay dili kini usa ka pribadong kompaniya, apan nganong padayon man ang pagpanglawgaw sa mga Garcia sa kasabutan?
Nahulog na hinuon nga napa-ubos sa “trial by publicity” ang joint venture agreement tungod sa privilege speech ni Pablo John nga gitumong aron mapaubos kini sa congressional inquiry.
Kinsa man ang makaluluoy kun malawgaw ang joint venture agreement? Si Mayor Tomas Osmeña ba? Si Bise Mayor Michael Rama ba? Si SRP manager Nagiel Bañacia ba? Si Gobernador Gwendolyn Garcia ba? Si Kongresista Pablo John Garcia ba?
Dili gyud.
Ang mga Sugboanon nga naghinamhinam nga makapahimulos sa katukoran unya sa mga proyekto diha sa luna sa SRP nga gipaubos sa kasabutan maoy makaluluoy.
Tingale, gusto sa mga Garcia nga matuman ang ilang pagsaway kaniadto sa SRP nga matud nila mahimo lamang usa ka “white elephant” nga sa atong pagsabot, usa ka halapad nga proyektong walay kagamitan ug walay silbe. Timan-i, sila lamang ang grabeng nakapanaway sa SRP, apan karon nga nagsugod na ang paglambo niini, gusto na usab nilang lawgawon.
Grabe na gyud nga nakatamay sa mga Sugboanon sa dakbayan ang mga tawong kanunay’ng nagpakaulaw sa bisan asa na lang nga forum.
* * *
Ang isyu sa mga Garcia nakapahinumdom hinuon nako sa akong makauulaw nga kasinatian sa Atlantic Hardware sa Bulacao, Talisay sa dihang nangompra ko og mga plumbing materials alang sa akong bag-ong balay sa Minglanilla.
Buot nakong bayran akong gipamalit pinaagi sa credit card mao nga gipa-tsekan nako sa sales attendant nga nailhan nako sa ngalang Jimboy kadtong mga ‘items’ nga mahimo nakong mautang pinaagi sa BPI.
Apan pag-abot nako sa cashier, gipanghagpatan ang mga materials. Imbes bayran nako pinaagi sa credit card, gipa-cash ang bali’g kapin sa P2,600, ang nahibilin nga nagkantidad na lang og kapin P1,300 mao ray nautang.
Ang nakaparat pa gyud, ang babayeng in-charge sa credit card mura’g walay gana nga motagad nako. Gi-isahan pa ko sa kilay, dayong tan-aw nako gikan tiil padulong ulo. Tingale gikilatis ko niya nganong naka-credit card kay mura ra man intawon og drayber sa habal-habal akong porma kay nagkalago ra man akong T-shirt ug short pants.
Dako pa gyud nga demalas kay naabtan ko og brown-out tungod sa kadugay niyang nakasulat diha sa resibo sa akong gipamalit tungod sa pagpunay og pakigtabi sa tupad niya nga cashier.
Ako pa gyu'y gibasol sa kanahan sa dihang gisita nako siya sa iyang paglangaylangay. Giingnan pa hinuon ko “gi-cash pa unta na nimo, wala ta kay problema.”Hasta akong anak nga mo-grade 4 karong abli sa klase nga kuyog nako sa Atlantic nakapangutana kun mahimo ra ba diay’ng tubagon og cashier ang kustomer. Kapaet baya!
Hala kamong mga buot mamalit sa Atlantic Hardware, pagsinena kamo og tarong kay basin makasinati kamo sa bati nakong kasinatian niadtong Biyernes. Pero kun akoy kamo, pangita na lang mo og laing tindahan oy!
* * *
Kun pasagdan lang sa mga opisyal sa barangay Pakigne, lungsod sa Minglanilla ang mga quarry operations sa kabukiran sa maong lungsod, ilabi na sa kasapaan sa Manduang ug Cuanos, moabot ra unya ang adlaw sa panudya kun maningil na ang kinaiyahan.
Kuyaw sa baha ang mga residensiya nga duol sa maong mga lugar nga gikubkoban og mga balas ug graba.
Apan ang labaw untang ikabalaka sa mga opisyal sa Pakigne mao ang pagpunay og agi sa karsada paingon sa Tubod sa mga dagkong dumptruck paingon sa Manduang ug Cuanos aron manghakot og mga balas ug graba.
Ang maong karsada nipis lang kaayo nga sa akong bana-bana gidesinyo lamang nga kaagian og sakyanang may gibug-atong 10 tonelada. Pila ka tonelada ang mga dumptruck? Ilabi na kun puno na kini sa balas ug graba.
Sa tunga-tunga sa karsada paingon sa Tubod, ilabi na kanang wala makaabot sa eskina paingon sa Spring Village, nagsugod na og pangliki.
Kun magpadayon pa ang pag-agi sa mga dagkong dumptruck, moabot ang panahon nga mangabuak kini.
Maayong aksiyonan na sa mga opisyal sa Pakigne ang maong isyu ug dili na lang paabuton nga mangabuak ang karsada nga ginama lamang sa nipis nga semento.
Aduna koy nadunggan nga adunay nanguwarta niining quarry operations. Nan, angay kining aksiyonan ni Kapitan Armando Juezan aron mapapas ang pagtuo sa mga taga Pakigne nga adunay nanguwarta sa quarry operations, sama sa giingon nilang P1,000 na ang gibulsa sa usa ka kagawad bisan wala pa makatuyok ang ferry’s wheel nga gimontar duol sa barangay hall.