Kun madayon nga did-an na ang mga mini-passenger buses sa pagpasakay ug pagpakanaug sa ilang mga pasahero diha sa Cebu South Bus Terminal, sigurado nga mominus g’yod ang koleksyon sa probinsya.
Wala man hinuon magsalig ang Kapitolyo sa kita sa ilang bus terminal apan bisan og katumbas lang unta ba sa ilang gasto ang ilang kitaon. Kapin sa usa ka gatus ka mini-passenger buses ang mahanaw kun ipatuman na ang maong ordinansa.
Sigurado man g’yod nga ang maong ordinansa maaprobahan kay wala may mosupak niini diha sa konseho.
Ang maong dapit nga nahimutangan sa South Bus Terminal mora’g dili na kaayo haum nga butangan og terminal sa mga bus kay makamugna kini og grabeng traffic problem sa Natalio Bacalso Avenue.
Tukma ang sugyot sa mga bus operators nga kinahanglang dunay bag-ong terminal nga himoon adto sa Mambaling, ilabi na sa access road sa South Road Properties sa Mambaling.
* * *
Kabahin sa isyu nga ang mga opisyal sa dakbayan sa Sugbo miaprobar sa kwestyonable nga transaksyon tali sa Filinvest Land Incorporated, mas pabor ko nga ang maong kaso dad-on sa hukmanan.
Akong gitan-aw pag-ayo ang mga isyu sa duha ka habig, ug akong natan-aw nga may basihanan usab si Kongresista Pablo John Garcia sa iyang mga argumento ug angay kini nga adto klarohon sa husay sa korte.
Dili hinuon ko moingon nga sad-an ang probinsya sa pagpataka og pasangil, samtang dili usab ko moingon nga walay sala ang mga opisyal sa dakbayan. Sa husay lagi sa korte, mahibaw-an g’yod busa maayo nga dad-on kining kasoha sa hukmanan.
* * *
Kadtong blue nga Toyota Tamarraw nga gihisgotan nako nga usa ra’y suga sa atubangan, ug wala g’yoy suga sa luyo samtang nasundan nako nga nagdagan usa ka gabii niana, iya diay sa Mabolo police station.
Palihug, kamong mga hepe sa kapolisan mandoi ninyo ang inyong mga “subordinate officials” nga tan-awa ang inyong mga sakyanan ug ayoha kun dunay mga kuwang.
Dili ra kay sa polis, kun dili apil ang mga sakyanan sa militar ug ubang ahensya sa kagamhanan. Kita maoy magsilbi nga ehemplo sa mga mata sa katawhan. Tigpatuman gani ta sa balaud, motuman ta para modayeg ang katawhan nato. Mahimo ba?
* * *
Usa ka drayber og motor nga nadakpan kay wala magsul-ob og crash helmet, nasugmoy dihang mikuha na unta siya sa iyang lisensya didto sa Land Transportation Office.
Nagdala siya og P500 kay abi niya og ang multa moabot ra og P300. Apan nasagmuyo siya dihang giingnan siya sa taga LTO nga ang multa sa iyang salaod P1,778.
Tagam ang maong batan-on nga mibaliwala ra sa balaud. Kamong mga drayber og habal-habal, kuhai ninyo kini og leksyon.
Samtang usa ka taxi driver kagahapon sa udto, mihimo og “illegal U-turn” diri g’yod atubangan sa The Freeman bisan og ang karsada dunay “solid line” nga nagpasabot nga dili makahimo og U-turn ang mga sakyanan.
Nangyawat man god ang drayber nga mapasakay niya ang nagpangamay nga pasahero nga diri sa pikas lane. Ignorante tingali sa balaud, nagdali-dali nga mi-U-turn sa walay paghuna-huna nga makamugna siya og kahasol sa ubang motorista.
Dihang gisita sa usa ka LTO agent, hapit na lang mohilak ang tiguwang. Grabeha. Pagtoon tawon mo sa balaud sa tukmang pagmaneho uy.
Ako gani kanunay man nga mobasa sa mga balaud nga gilatid sa Republic Act 4136 ug sa mga DOTC-LTO Memorandum Circulars para dili ko masayop. Timan-i nga “ignorance of the law, excuses no one.”