Tulo ka batan-on

Usa ka nagpailang concerned citizen mitaho kanako nga milihok karon ang mga hold-aper nga magmotorsiklo. Tulo kini sila nga pulos pa mga batan-on. Sagad silang molihok panahon sa kagabhion, ilabi na sa kaadlawon.

Ang kasagaran sa mga dapit diin adto mag-operate kining maong mga hold-aper mao ang Fuente Rotonda, Plaza Independencia ug ang mga dapit nga buhi panahon sa kagabhion gumikan sa nightlife.

Magbagdoy kining maong tulo ka batan-on panahon sa kagabhion sakay sa kaugalingon nilang motorsiklo aron pagpangita og biktimahon. Kun makakita gani sila og tukmang tayming, duolon dayon nila ang makursonadahan nilang biktimahon ug tionan kinig hinagiban dungan ang pagdeklarar og hold-ap.

Daghan na ang nabiktima niining maong mga suspek. Pagbantay kamo niini. Maayo usab unta kun mapanid-an kini sa atong kapolisan aron nga masikop kining maong mga batan-on.

Sa usa ka gula sa Banat News maoy item ning akong lindog ang bahin sa uapt ka mangunguot nga anha maghulat sa ilang biktimahon sa may eskina sa Manalili ug Legaspi. Ang maong kasayoran gihatod kanako sa texter nga tag-iya sa cellphone number 0918-5040644.

Gumikan sa mao kong sinulat, may laing nagpakabanang indibidwal nga mi-text kanako ug mikompirmar nga tinuod ang maong kasayoran. Ang lain pa natong texter (0910-8585700) nagpaila nga usa ka security guard.

Sa iyang text kanako, iyang gikompirmar nga tinuod gayod nga naay mga mangunguot diha sa may eskina sa Manalili ug Legaspi. Upat gyod sila ka tawo. Sumala sa atong texter, maayong hiposon kanang mga tawhana.

Pagbantay kamo niini!

* * *

Sa laing bahin: "Hi...! Ngano man kanang Globe nga sige man og paghatag og ringtone bisan wala ta mangayo. Unya kuhaan ang atong load." -- 0915-2507553

Sa akong nasayran, ang mga network provider nag-andam og dugang mga serbisyo aron paghatag og katagbawan sa ilang mga subscriber. Usa na niini ang ringtone ug logo nga puyde nilang ipadala pinaagi ra sab sa cellphone. Siyempre, makuhaan ang load kun mo-avail ka niini. Pero kun tinuod man, dili maayong padad-an pod nila’g ringtone or logo ang subscriber nga wala mag-request ug unya makuhaan pa gayod ang load niini. Angay kining hunongon.

* * *

 (Sumbong ug reklamo? Text sa 0910-8105522).