Wa kunoy labot ang Malacañang sa Cha-cha!

Tuo ka ini, Dro? Buot ba nilang ipasabot nga initiative ra ni ni House Speaker Nograles ug sa mga Gloria Congressmen?

Mao ni ang problema ning atong panahon karon. Morag miabot na ang panahon nga maglisud na ta'g ila kinsa ang atong tuhoan, kinsay dili. Kinsay nagsulti sa tinuod, kinsay namakak. Mahimo nga ang duha namakak, apan, imposible kaayo nga ang duha nagsulti sa tinuod. 

Credibility. Kun mawala na kini kanimo, kun wala nay motuo kanimo, lisud na.

Maayo pa'g di na lang ka motingog, kay daghan pa ang motuo kanimo. Dili sayon nga mahimo kang tigpamaba sa mga bakak.  

Ang mahitabo mao nga bisag unsaon nimo'g pangugat, bisan pa gani'g nagsulti na ikaw sa tinuod, ang mga tawo magduda na – kun maayo nang pagkaguba ang imong credibility.

Ang mahitabo mao nga sukwahi ug bali ang tuhoan sa tawo. Pag-ingon nila nga walay ransom nga gihatag ngadto sa mga kidnaper, ang sabut sa mga tawo mao nga duna gyud diay ransom nga gihatag. Maoy hinungdan nga pag-ingon nila nga walay labot ang Malacañang sa renewed cha-cha initiative, maoy pagtuo sa mga tawo duna gyud sila'y labot. Gawas pa, mga isyu nga sama niini, molihok ba gud ang House of Representatives kun walay go-signal sa Malacañang?

Ang mga tawo ra ba ron, mga wise na kaayo. Tando-tando lang, pakapinan pa'g pakpak-pakpak, apan, sulod sa ilang kahiladman, nangyam-id diay. Sa ato pa, dili mailad. Mao ni ang atong bantayan, tungod kay dili nato ma-fooled ang tanang tawo sa tanang higayon. Usahay gani, kita na hinuon ang ilang tuntohon.

Ang resulta sa miaging national election, nagpakita nga nagmata na ang lungsod, sa giingon ni Serging kanhi: Lamya ang paon, iluwa ang taga’. Ug kun mahinayon man ang election, kun masanta ang Nograles cha-cha initiative, lagmit mao kini ang mahitabo sa 2010 election, diin maghitak ang salapi, sa ato pa, daghang paon nga atong tunlon, ug daghan sad unya tang mga taga’ nga ipangluwa. Alegreha no? Di kaha ta mangabukog ini, Dro?

Anyway, ambut ngano nga ila man gyung ipamugos ang Cha-cha? Nganong karon man gyud, ug nganong sila ra man ang magbuot, ug wa nay labut ang Senado? Di ba mahimo nga unya na tapus sa 2010 election mag-Cha-cha, aron di mo dudahan nga duna moy mga hidden agenda? Pangutana lang!