NFA sa Kamagayan

Gikan sa cell. no. 0921-2162718: “Reklamo lang ko bahin sa tindahan og NFA rice ngari sa center Kamagayan. Hangyo mi wa ticket kay naa man lagi sila tagaan tag 10 kilos ngadto sa 15 kilos nga naninda og pagkaon diri sa duol. Ingon ini diay ni? Luoy ming mga pobre.” --(Sent:11:09:06pm-- June 30, 2008)

Dili lang una ta mamasangil nga may nahitabong anomaliya o ba kaha iregularidad bahin sa pagpang-apod-apod sa NFA rice diha sa Kamagayan. Labina kay dili kaayo klaro ang detalye sa atong texter.

Ang ako lang ikasulti mao nga angay palamboon ang sistema sa pagbaligya sa NFA. Kana bang sistema nga mao gyud makapalit kadtong angay gyud baligyaan sa maong baratong bugas. Ug kinahanglan gyud nga maangay ang tanang gustong mopalit -- patas nga pagbaligya.

Labing maayo sab unta nga ang NFA retailer mopasabot sa iyang habig kalabot ning gireklamo sa usa ka texter. Bukas kanunay kining lindog alang sa iyang explanation.

* * *

“Good day, Sir. Naay dispatser diri sa Pit-os nga abusado kaayo. Kanang rota paingon Mandaue magsige siya’g pangayo og P5 matag larga. Mag-antiyohos ni siya kanunay.” -- 0920-2851784 (Sent: 12:03:24pm-- June 30, 2008)

Extortion na ang gihimo sa maong dispatser. Sobra na ang iyang gibuhat ug angayan nang manginlabot niini ang mga law enforcer.

Tiaw bay tag P5 ang iyang kolektahon matag larga? Unsa man kunoy iyang katungod ug awtoridad sa pagpangolekta’g ingon niana nga kantidad? Lupig man sab siya ang nakatag-iya og parkingan!

Mga tanod ug polis, badlonga ninyo kanang maong dispatser, uy! Nakapuwerhisyo kanang maong dispatser sa mga driver. Tiaw bay P5 gyud ang iyang kolektahon ngadto sa mga driver. Kuwang na la’g diyotay kun dili baleg plite sa usa ka pasahero ang iyang kolektahon. Pastilan!

Nagpatuyang na man lang sab og pabaga sa iyang nawong kanang maong dispatser. Wala ra ba gyud kinahanglana sa mga driver kanang iyang serbisyo. Manakay ang mga pasahero og PUJ bisan walay dispatser, uy!

 (Sumbong ug reklamo? Text sa 0910-8105522).