Lihok pinasagad

Daghan kaayo ang nakasaway sa mga polis nga mihimo og imbestigasyon ug follow-up operation sa nahitabo sa asawa sa broadcaster nga si Ted Failon.

Bitaw, kun tan-awon nimo ang footage sa mga TV reports, makita nimo nga gilapas sa kapolisan ang balaud ilabi na ang lagda sa Rules on Criminal Procedures.

Dunay lagda nga gilatid sa Rule 113, section 5, diha sa Rules on Criminal Procedures kun kanus-a ang usa ka tawo mahimong dakpon nga dili kinahanglan ang warrant of arrest.

Aw buyno, bisan og debatihonon pa kun nasubay pa sa lagda ang ilang pag-pick-up sa mga tawo nga kunohay ila ra nga giimbitar, apan wala nila tumana ang angay unta nga himoon.

Ang tukma nga pagpasakay sa patrol car sa mga tawo nga dakpon apil kadtong pik-apon aron sukit-sukiton, tapin-an pa gani ang ulo sa palad aron nga dili kini maparok.

Apan kadtong mipik-ap sa mga paryente sa asawa ni Ted Failon, apil na sa mga katabang, “mipaslak” ra nila sa patrol car. Ako nga nagtan-aw, nakapanglingo-lingo ko uy.

Usa kini sa akong giingon nga angay g’yod nga ang mga law enforcers mobasa g’yod sa mga balaud ug sa mga tukma nga lagda nga aron malikayan nga makahimo sila og sayop.

Unya, bisan og nasayod na sila niini, sigi gihapon sila og sukit-sukit sa mga tawo nga gi-pick-up nga walay abogado. Nakalapas kini sa lagda sa Republic Act 7438.

Kining maong balaud mao ang local version sa nabantog na kaayo nga “Miranda doctrine” didto sa Estados Unidos.

Daghang polis ang igo lang moingon nga “miranda doctrine” ug wala masayod nga ang Pilipinas may balaud na kabahin sa “custodial investigation.”

* * *

Mobalik na kuno si Mayor Tomas Osmeña sa Sugbo karong sunod buwan. Maayo nuon para dili na kaayo ma-busy si Bise Mayor Mike Rama.

Lahi man god og estelo si Rama kay ni Tommy. Kaming mga reporters usahay dili maka-interview niya ug daghang bisita nga dili niya matagad sa opisina kay sigi lang “out of office.”

Hinuon, nasabtan nako nga gipalabi ni Rama nga mogawas kanunay para mosamot nga siya makit-an sa katawhan kay nangambisyon man siya sa mas taas nga posisyon.

Mayor man g’yod ang daganan aning Rama, ug gisalikway niya ang sugyot nga mag-kongresista sa south district.

Aw kay mag-mayor man g’yod si Mike, maisip nato nga ang labing lig-on karon nga kandidato unya sa south district mao g’yod si Jonathan Guardo.

Nakadungog ko og report nga bisan og napilde si Guardo kaniadtong eleksyon sa tuig 2007, apan wala kini maluya ug hinoon, gidugangan pa ang iyang pakigsuod sa katawhan sa south district.

Sayonan ka nga kadtong mga kabus nga wala g’yod intawo’y ikaabot pagpalit og lungon, hatagan diay ni Guardo og lungon aron nga dili na maproblema.

Buyno, si konsehal Gerry Carillo mora’g nagplano man kuno nga molansar pagka kongresista diha sa south district, daku-daku pa g’yod ang problema nimo nga atubangon Sir.

Alang nako, ang mga tawo nga angay’ng ibutang sa pwesto sa kagamhanan mao kadtong andam moalagad alang sa katawhan, ilabi na ang paghatag kanila og health services.

Ang uban nga gihugon-hugonan nga modagan diha sa south district mao sila si Konsehal Bebot Abellanosa ug Press Secretary Cerge Remonde.

Sige lang, usbon nako, kadtong mga maayo og programa alang sa kaayohan sa katawhan maoy angay nato nga suportahan. Dunay uban diha maayo lang sa pasalig.

Hain na kaha ang giingon ni Kongresista Tony Cuenco nga tukoran niya og flyover ang eskena sa V. Rama ug Natalio Bacalso Avenue. Hapit na lang mahuman ang iyang termino.