Niay usa ka dayag nga pagpanglingla sa promo sa usa ka tindahan og cellphone. Ako mismo ang nakadiskobre niini. Taphaw ang ilang taktika maong dali ra kaayong masakpan kun maantigo kang motimaan o nasuheto ka sa presyo sa mga cellphone karon.
Pananglit, ang cellphone nagkantidad og P1,400. Ila kanang ibaligya og buy one take one. Nga sa ato pa, kun mopalit ka og usa ka cellphone, baleg duha ang imong madawat kay may lain mang usa nga ipataban. Nindot unta kaayo, no?
Pero dili ka angay mahinangop kay dunay lipat-lipat ini. Kay ang cellphone nga nagkantidad lang og P1,400 sa regular price, ibaligya na nila sa presyo nga P2,850 sa buy one take one. Nga sa ato pa, tabla ra gihapon og imong gibayran ang cellphone nga gipataban sa imong gipalit.
Dili ba klaro man kining panglingla? Angayan ning susihon sa DTI!
* * *
Niadtong Septiyembre 25, 2008 adunay nag-text nako nga nagpaila lang nga usa ka residente sa Dumanjug, Cebu. Iya kong gibalitaan nga ang iyang amiga ug silingan nabiktima gyod intawon nianang text scam nga nagpadayon pa pagsirkular hangtod karon.
Nakadawat og text ang iyang higala nga (kuno) nakadaog kinig dakong kantidad pinaagi sa usa ka text promo. Gipatolan ang maong text sa iyang higala. Pag-angdo, ang iyang higala maoy nawad-an og kuwarta!
Busa kun makadawat gani mog congratulatory message, ayaw gyod kini ninyo’g tagda. Dugay na kining maong estilo sa modus. Timan-i ninyo nga imposible ang pagdaog sa promo nga wala ninyo apili.
* * *
Ang naggamit sa cell. no. 0920-2025500 mi-text nako niadtong Septiyembre 26, 2008, nagpadangat sa iyang reklamo bahin sa saba kaayong videokehan sulod sa Bogo terminal bisan lawom nang gabii. Dili kuno makatulog silang mga driver.
Maayo unta nga ma-regulate ang gikusgon sa sounds sa maong videokehan aron dili kana maisip nga public nuisance.
* * *
(Sumbong ug reklamo? Text sa 0910-8105522).