Tambisan na sab

Kada adlaw gyud kong makadawat og text gikan sa nagpakabana tang kaigsuonan nga nakasaway pag-ayo sa naghitak nga sugal diha sa Tambisan. Lainlain nga texter ang nagpadangat nako sa maong kasayoran. Grabeha, uy!

Usa sa nag-text nako niingon: "Good AM. Kapait baya diri sa among dapit, uy. Diri ni sa Tambisan, Tisa, Cebu City. Bisan og illegal ang tigbakay mora na man hinuon og legal kay kada adlaw na man magtigbakay ang mga sugarol. Kada hapon gyod ni. Saba kaayo. Daghan sad ang magsugal og mahjong, hantak ug uban pa. Naa pa gyu’y nagpayuhot og ginadiling drugas. Unya inigkagabii naay mga babaye nga magbaligya sa ilang unod. Naa ra bay mga menor de edad pa. Maayo untag masanta ni sa mga ahensiya sa gobiyerno nga nahingtungdan niini." -- 0910-7357149

Kun maoy atong tuohan kining kasayoran nga gihatag sa usa ka tipster makaingon kita nga grabe na gyud ang paghitak sa illegal nga sugal ug ubang daotang bisyo diha sa Tambisan.

Ug nagtuo ko nga kun ang mga nahingtungdang ahensiya sa gobyerno maoy pangutan-on, apil na ang lokal nga mga opisyal, maoy pangutan-on, ang labing posible nilang itubag mao: "Wa man mi makadawat og report mahitungod niana."

Mao man kini kasagaran nilang lihay, dili ba? Kadali ra man gyod ni silang makakitag planggana ug manghunaw. Pastilan!

Akong isugyot ngadto sa atong tipster nga magpadangat siyag reklamo mahitungod niining illegal nga sugal diha sa Tambisan ngadto sa barangay. Mas maayo nga magpadangat kag pormal nga sumbong ngadto nila. Kun dili sila mohimog aksiyon, kamo nay magtimbang-timbang kun hain sila makapusta, kamo nay mohukom.

Pinaagi sab ning akong agony column, sangpiton ko ang atensiyon sa mga barangay opisyal sa Tisa. (By the way, sa Tisa ba gyud nasakop nang Tambisan? O sa Labangon. Ang uban god nga ni-text nako miingon man nga sakop kana sa Labangon). Aksiyoni kini ninyo.

Ang mga opisyal sa barangay man gyud untay angay manginlabot pag-una niini kay sila man ang mas nasuheto sa dapit. Unya makig-coordinate sila sa lainlaing ahensiya sa kagamhanan alang sa mga dinalian ug epektibong aksiyon!

 (Sumbong ug reklamo? Text sa 0910-8105522).