Litsonan

"Good day, Sir. Kining Sr. ____ diha sa Tabada, ba. Nagpalit kog letson diha. Kulang man og usa ka paa ang lechon." -- 0928-7147862

Ang ngalan ning maong letsonan dili bag-o alang nako. Nakadawat na man god kog daghang reklamo bahin niini sa uban nilang branch sa lainlaing mga dapit sa Metro Cebu.

Nagtuo baya ko nga modus operandi ra kini sa tigtadtad sa letson ug walay kasayoran niini ang ilang employer. Pero makadaot ni sa ilang negosyo kun dili nila madisiplina ang ilang mga trabahante.

Makadaghan na ako makadawat og reklamo nga kulang og paa o ba kaha pako ang ilang napalit nga letson sa Sr. ______. Mao sab diay kini gibuhat sa ilang outlet diha sa Tabada.

Labing maayo magbantay mong mga pumapalit. Bantayi ninyo ang pagtadtad sa letson nga inyong gipalit. Sa dili pa kamo mobiya sa letsonan, mas maayong inyong tsek-apon (check up) kun wala bay nakulang sa letson nga inyong gipalit aron makareklamo dayon kamo.

Ug ngadto sa tag-iya sa Sr. _______lechon, subaya ang binuhatan sa imong mga trabahante.

* * *

"Good day. Luoy kaayo ang manindahay og ukay-ukay atbang sa San Jose sa may Carbon. Ang iyang mga baligya gipangsulod sa dakong bag sa duha ka kawatan samtang ang tag-iya nagkaon. Hadlok kong mosumbong kay wa may polis." -- 0908-3255383

Wala sab kay kasumbongan kay wala man kahay polis.

Bitaw, gikinahanglan gyod unta ang police visibility labina sa mga lugar nga dansohanan sa daghang tawo, sama dihang dapita sa Carbon.

Bentaha man gyod kun may polis nga makita ang mga badlongon kay kini maka-discourage nila pagpasalir sa ilang tinonto.

Aw, gawas lang kaha kun kakunsabo ang polis sa mga badlongon kay dili na mag-ukon-ukon paghimog tinonto kining mga tawhana. Pero lahi na kana nga estorya.

Again, gikinahanglan ang police visibility.

* * *

(Sumbong ug reklamo? Text sa 0910-8105522).