Bukal na'g sugod ang politika

Nagsugod na g’yod karon ang propaganda sa politika. Makita ug madungog na nimo diha sa mga television, radyo ug mabasa nimo sa mga mantalaan ang mga paukyab sa mga politiko.

Duna sa’y mga politiko nga naglaraw pagdagan sa usa ka pwesto nga mihinay-hinay na sa pagpangita’g isyu sa ilang kontra sa politika. Nakadawat ko og “press release” nga nagbutyag nga dunay usa ka nagtinguha nga mag-kongresista dinhi sa dakbayan nga wala kuno makahuman og kurso.

Aron kuno dili mauwawan, nagpa-enroll sa usa ka unibersidad bisan og wala g’yod kini magtungha kay tua man kini pirmi sa kaulohan.

Apan natingala sila kay naapil man kuno ang ngalan sa mga tinun-an nga gipapasar. Ang akong ikasulti niini mao nga dili pa nato kini matuki ang isyu kay dili pa man siya kandidato.

Mahimo tingali kini kun ang iyang mga “classmates” moreklamo ug mopirma og affidavits, nga magmatuod nga ang maong tinun-an nga gustong magkongresista, walay sulod-sulod sa klase apan nakapasar. Tingali nakasabot g’yod mo og kinsa kining tawhana nga gipasabot sa nagpadala kanako og suwat. Bisan usab og wala butangi og ngalan sa nagpadala sa suwat, nakaila ko kaniya tungod sa iyang estelo sa sinuwatan ug sinultihan.

Maayo usab kini nga isyu, apan nindot ni kun moreklamo kadtong mga kaklase sa maong tawo nga nagpa-enroll apan walay tunga-tunga sa klase.

Tukion nato kining maong isyu sa umaabot nga mga adlaw.

* * *

Dinhi sa dakbayan, daghan ang mangutana kanako kun si Bise Mayor Mike Rama mao ba g’yod ang paluyohan ni Mayor Tomas Osmeña sa eleksyon karong sunod tuig. Ang akong tubag mao nga mora’g dunay tilimad-on nga magkabuwag sila si Mike ug Tommy sa umaabot nga eleksyon.

Ang panglantaw sa uban mao kini. Kun si Tommy motugot nga si Mike maoy makalingkod nga mayor sa dakbayan, tingali dili na siya makabanos sulod sa siyam ka tuig.

Mahimo pa gani nga human sa siyam ka tuig nga tulo ka termino ni Mike, ang iyang anak maoy padaganon puli niya.

Mao nga dunay dakung posibilidad nga si Kongresista Raul del Mar, kang kansang termino mapupos na usab sunod tuig, maoy padaganon pagka mayor.

Kay kun si Del Mar gud, sigurado man nga usa ra g’yod ka termino ang iyang pagka mayor kay mobalik man siya pagdagan pagka kongresista sa north district.

Dili malilong nga si Mike duna sa’y mga supporters. Mas daku pa gani siya og botos kay kang Tommy sa matag eleksyon. Apan kana kay pareho man sila nga midagan ubos sa BOPK.

Tan-aw nako, kun mahitabo nga magkabuwag sila – nga si Mike dili na sabakon sa BOPK, duna g’yoy posibilidad nga kadtong ubang mibotar ni Mike nga mga BOPK supporters, dili na mobotar.

Pero ang maayo g’yod nga dili magkabuwag sila si Tommy ug Mike. Dili ikalimod nga maayo g’yod og batasan si Mike, sayon duolon sa katawhan.

* * *

Mentras layo pa ang eleksyon, tambag nako sa mga botante nga ayaw g’yod mo pagbotar og kandidato abi kay ang kandidato sakop sa usa ka partido o grupo.

Ang maayong suportahan mao kadtong mga tawo nga dunay panglantaw sa paghatag og maayong pagtagad sa pag-atiman sa atong panglawas.

Apan baya usab kining ubang botante uy, dili kamao motan-aw og maayong kandidato. Abi kay ilang kaila, hala botar na lang bisan og walay hibangkaagan sa trabaho.