Bakasyon sa Argao

Ang lulinghayaw uban sa pamilya sa mga higayon nga taas-taas ang bakasyon sama sa Semana Santa nagpabiling patok alang sa mga Pinoy. Timaan niini mao ang pagsugwak sa atong mga resorts sa miaging bakasyon.

Sama sa nangaging mga bakasyon, niuli mi sa akong pamilya didto sa Argao. Apan lahi sa nangaging katuigan, dihay bisita nga among gisuroy hinungdan nga unang higayon sab nako nga nasuroy ang mga nindot ug makabibihag nga talan-awon sa Argao.

Bisan sa krisis sa ekonomiya daghan gihapon sa katawhan ang misuroy sa mga resort atol sa Semana Santa. Higayon sab sa mga ubang mga mapahimuslanong mga tawo aron panapion og maayo ang mga dayo. Didto lang sa Mahayahay sa Argao, ang kaniadtong public beach, karon duna nay mga cottages nga gitukod sa mga pribadong tawo. Labihan nakapaburot sa presyo sa mga tagdumala, lupig pa ang airconditioned room sa usa ka nindot nga resort kun makabungat sa presyo.

Apan bisan sa ka mahal sa cottage nagsugwak gihapon ang mga nangabang timaan nga way epekto ang krisis sa industriya sa turismo dinhi sa atong dapit.

Bisan didto sa bugnaw ug makabibihag sab nga Obong Spring sa Dalaguete nagsugwak sab ang mga dayo nga misuroy sa maong dapit.

* * *

Gawas sa pagpangaligo sa dagat ug spring gisuroy sab nako sa unang higayon ang nabantog nga "Balay sa Agta cave" ug ang Bugasok Falls sa Argao. Nindot ug makabibihag ang talan-awon paingon sa maong mga dapit.

Among gisubay ang sapa gikan sa Usmad paingon sa Bugasok niadtong Biyernes Santo sa hapon. Bisan kapoy apan wa namo igsapayan tungod sa kanindot sa kinaiyahan.

Ilawom sa tag-as nga kakahoyan, miduyog sa among mga tunob ang tingog sa mga gangis ug huni sa mga langgam. Ang kanaas sa tubig gikan sa sapa naghatag kanamo og dugang kusog ug kaabtik aron ipadayon ang among mga lakang paingon sa baba sa langub sa balay sa agta ug sa Bugasok Falls.

Ang kauhaw sa among pagbaktas sa mga dies kilometros nga gilay-on gihupay sa nagsugwak nga tinubdan sa tubig daplin sa sapa nga among gisubay. Ang bagang duot sa mga alibangbang nga nagkalain-lain ang kolor daw sa naghatag og giya kanamo paingon sa baba sa langub ug sa falls ingon man ang naghinagwaay nga mga unggoy sa ibabaw sa dakong bukid hingpit nga nakapapas sa among kakapoy hangtud nga naabot namo ang among distinasyon.

Apan wa pa makumpleto ang among bakasyon niadtong higayona tungod kay laing dapit nga kinahanglang di gyud pakyason sa mga mobisita sa Argao mao ang River Stone Castle.

Ang European inspired nga edipisyo nga gipanag-iya ni Mayor Edsel Galeos ug sa iyang maguwang nga si collector Edgar Galeos nagtanyag sab sa talagsaon nga kasinatian.

Among gisuroy ang maong dapit kagahapon ug wa mi magmahay sa among pagsulod niini tungod kay gawas sa ka puno sa nindot nga talan-awon niini, imo sab nga masaksihan ang mga antigo nga di na nimo basta basta nga makit-an.

Busa sa sunod ninyong pagbisita sa Argao ayaw sipyata ang mga dapit nga akong gihisgutan alang sa di ninyo malimtang kasinatian.

* * *

[email protected]