Kapait sa tubig

Swerte kaayo kaming dia magpuyo sa bukid karong panahona nga kwaresma kay bugnaw ug hayahay g’yod ang among dapit kun itandi sa ubang mga lugar diha sa dakbayan.

Gani samtang nagsuwat ko niining akong lindog, dia ko sa kayda sa akong payag, ug matag karon og unya mosapigad kanako ang bugnaw ug presko kaayong hangin.

Kay ang akong payag nahimutang man sa ibabaw nga bahin sa usa ka bungtod, makita kaayo nako ang mga dahon sa kahoy nga atua sa atbang nga mga bungtod nga daw sa nagyapa-yapa sa kalipay.

Apan bisan og hayahay diri sa among nahimutangan, dili gihapon perpekto tungod kay – dili sama diha sa ubos – abunda sila sa tubig samtang kami nihit.

Diri sa bukid, magpawong-pawong ang suplay sa tubig kay tingali nihit na ang tubig sa MCWD ug ang ilang bomba dili na makabuga og tubig paingon sa among nahimutangan.

Dia sa baga kaayong dokumento nga akong gihuptan, nga naapil sa “agenda” sa konseho mao ang application sa duha ka buot magmugna og kaugalingong tinubdan sa ilang tubig.

Ang usa sa mga applicants dia ra duol sa among nahimutangan sa Nivel Hills. Swerte ang maong mga tawo kay may ikaabot man sila paggasto aron makabaton og kaugalingong tinubdan sa tubig.

Kami nga dili makaabot paggasto pagmugna og kaugalingon namong tinubdan, igo ra g’yod sa pagpangandoy nga moabot na ang panahon nga may “investor” nga magmugna og water project diri sa kabukiran.

Gitug-anan ko ni Apas barangay councilman Allan Majait nga duna na kuno’y mipadayag og kaikag nga magmugna og water project sa among dapit.

Daan na nga ang kadagkoan sa MCWD miawhag ni bisan kinsa nga investor nga mangita og tinubdan, diri sa Upper Apas, aron makatabang sila pagsuplay og tubig sa mga nanginahanglan.

Kami diri sa bukid, nag-antos tawon mi sa mahal kaayong tubig nga nagkantidad og P70 ang cubic meter. Kadtong uban nga ang palit gipaagi sa container nga tag P5, makabayad og P250 ang cubic meter.

Abi ninyo og ngano? Ang usa ka cubic meter nga tubig katumbas sa lima ka baril. Ang usa ka baril mosulod og 10 ka container. Sa ato pa, ang lima ka baril, moabot og 50 ka containers. Sa tag P5 ang container, P250 ang usa ka cubic meter.

Kun ang usa ka pamilya dunay upat ka sakop, sa ato pa unom ang tanan dala sa inahan ug amahan, sa usa ka buwan makahurot kini og mga 15 ka cubic meters nga tubig.

Pananglit minudo ang paagi sa iyang pagpalit, mogasto kini og P3,750 ang buwan sa tubig lang. Dili ba pait kaayo ang kahimtang.

Mao nga padayon ko nga mohangyo sa taga MCWD nga mangita g’yod unta sila og paagi nga masulbad kining maong problema.

* * *

Ang akong cellphone kaniadtong Biyernes Santo, walay hunong nga nakadawat og mga text messages nga nagpahibalo nako mahitungod sa mga tigbakay.

Sama diha sa Lorega, Caretta ug uban pang dapit. Apan wala na lang nako tagda kay gisabot na lang nako ang batasan sa mga sugarol nato nga mga igsoon.

Duna sa’y mireklamo nga may mga sakyanan nga nag-over charging kon nangobra og subra nga pletehan sa ilang mga pasahero, apan kuwang og detalyi.

Kamong mga dunay reklamo, akong balikon nga timan-i ang ngalan sa sakyanan, plate numbers, oras, ug uban pang detalyi dayon ipadala sa LTO. Ang media, sama nako, hatagi lang sa kopya sa inyong reklamo nga gi-receive sa operations branch sa LTO kay aron among mahimoan og follow-up.