Tungod sa giingon niyang iregularidad sa kasabutan tali sa dakbayan sa Sugbo ug Filinvest Land Inc., tinguha karon ni kongresista Pablo John Garcia ug Kapitolyo nga mapahigayon ang usa ka Congressional Inquiry aron mapalabang ang usa ka balaodnon nga magprotihir na unya sa samang suliran sa umaabot nga panahon.
Tungod sa maong tinguha gitigom na ni Gobernador Gwen Garcia ang lima ka mga kongresista sa lalawigan sa Sugbo lakip na ang sakop sa BOPK nga si kongresista Tony Cuenco sa South district sa dakbayan sa Sugbo.
Kining tinguha nga Congressional Inquiry, papogi lang ni Pablo John ug sa Kapitolyo. Gawas nga papogi lang, pag usik-usik ra usab kini sa oras ug salapi sa atong gobiyerno.
Kun adunay iregularidad ang kasabutan sa dakbayan sa Sugbo ug sa Filinvest nganong dili naman lang moderitso sa pagpasaka og kaso ang Kapitolyo sa atong hukmanan o ba kaha sa buhatan sa ombudsman batok sa City Hall isip pilderong bidders sa pag-ugmad sa luna sa South Road Property?
Kun nakita ni Pablo John ug sa Kapitolyo ang iregularidad sa kasabutan sa dakbayan sa Sugbo ug sa Filinvest nga angayang palabangan og balaodnon aron dili na mausab ang samang iregularidad sa umaabot nga panahon, nganong dili naman lang moderitso sa pagpalabang og balaodnon sa ubos balay balauranan si kongresista Pablo John Garcia?
Nganong mag-Congressional Inquiry pa man siya? Pasikat lang na imo Pablo John.
* * *
Sa wa pa siya mobakasyon didto sa Tsina, gimandoan ni Bise Mayor Mike Rama ang mga konsehal sa dakbayan sa Sugbo nga tun-an ang kasabutan tali sa dakbayan ug sa Filinvest aron makatubag kini kun pangutan-on sa mga tigom unya nga ilang tambungan. Ang maong kamandoan gituman usab sa mga konsehal.
Ang kamandoan sa Bise Mayor ngadto sa mga konsehal usa ka buhing kamatuoran nga wa diay nila tun-i pagmaayo ang kasabutan sa dakbayan ug Filinvest. Tungod kay kauban ra sila tanan diha sa konseho, nagyango-yango na lang sila sa kasabutan. Mao lagi ni makadaot kun walay oposisyon.