Gigamit sa pamolitika?

Niadtong ikaduhang semana sa bulan sa Hulyo nakadawat ko’g daghang reklamo gikan sa lainlaing magbabasa ning lindog. Ang ilang reklamo nga gipaagi sa text mahitungod sa iregularidad sa pagpang-apud-apod sa NFA rice sa tagsatagsa nila ka dapit.

Ang reklamo naggikan sa mga texters nga nagpuyo sa lainlaing kalungsoran ug kabarangayan nga nahisakop sa lalawigan sa Sugbu. Nahibulong ang mga reklamante nganong nihit ang mapalit nga NFA rice nga nakakita man sila sa daghang bugas nga gi-deliver sa taga NFA ngadto sa retailer.

Ang uban gibaligya (kuno) isip commercial rice. Dili makapalit ang katawhan kay gibaligya man ang NFA rice sa retailer ngadto sa laing negosyante.

May mireklamo sab kay gipili lang sa retailer ang baligyaan sa NFA rice. Kadto ra kunong mga tawo sa kapitan o konsehal maoy baligyaan. Sa laktod, gigamit sa pamolitika ang bugas sa NFA!

Kining maong mga iregularidad angay susihon, panid-an ug imbestigahon sa kadagkoan sa NFA. Hinaot unta nga mabadlong ang tanang nagbuhat og ingon niini.

* * *

Ang naggamit sa cell. no.  0922-4040857 mi-text nako niadtong July 12, 2008 (Sent:06:22:16am) ug mipahibalo nga diha sa brgy. Cambaro, Mandaue City adunay gihimong dalan pero walay drainage.

Wala iklaro sa atong texter kun bag-o lang gi-develop ang maong dalan o karaan na ang maong dalan ug karon gitrabaho na kini aron monindot na’g maayo. Pero iyang gihulagway nga “ang tubig nagpundo ug daghan na kaayong lamok” sa nabara nga tubig gumikan kay walay drainage.

Mas maayo tingali nga mabuhatan og lutsanan ang nagluyo nga tubig kay peligro kini nga kaitlogan sa mga lamok nga nagdala sa dengue.

Midugang ang atong texter nga daghan sab kunong rugby boys sa maong dapit ug wala gyud makabadlong niini ang mga tanod. Bugalbugalan ra gani kuno sa mga rugby boys ang mga tanod. Pastilan!

Aksiyoni ni ninyo, uy!

* * *

 (Sumbong ug reklamo? Text sa 0910-8105522).